Ár jyldarǵy testiler qoldanylǵan: UBT-da qandaı buzýshylyqtar anyqtaldy

NUR-SULTAN. QazAqparat – Qazaqstanda Ulttyq biryńǵaı testileý ótken 161 pýnkte ereje buzýshylyqtar anyqtaldy. Bul týraly Respýblıkalyq arnaıy monıtorıng tobynyń jetekshisi Aıgúl Soloveva QR Sybaıdas jemqorlyqqa qarsy qyzmeti uıymdastyrǵan tikeleı efırde aıtty, dep habarlaıdy QazAqparat tilshisi.

«21 maýsym men 5 shilde aralyǵynda 161 pýnkte UBT boıynsha monıtorıng júrgizildi. UBT ótkizý erejesi buzylǵan 300 fakti anyqtalyp, bizdiń tarapymyzdan saraptama jasaldy. Negizgi ereje buzýshylyq uıaly telefon alyp kelýmen baılanysty. UBT tapsyrýshy qalamasa da ata-anasynyń aralasýymen uıaly telefon alyp kelgen jaǵdaılar anyqtaldy. Arnaıy monıtorıng toby múshúlerine psıhologııalyq qysym kórsetildi, olardyń ishinde pedagogtar tarapynan da boldy», - deıdi Respýblıkalyq arnaıy monıtorıng tobynyń jetekshisi Aıgúl Soloveva.

Onyń aıtýynsha, UBT ótken keı jerlerde uıaly baılanys munaralary buǵattalmaǵan. Taǵy bir jaǵdaıda UBT ótetin mektep buǵattaýǵa kelmeıtin osyndaı munaralar janynan ádeıige tańdalǵan.

«Sondaı-aq, UBT ótkizgen kezde ártúrli jyldardaǵy test nusqalary qoldanylǵany anyqtaldy. Bilim jáne ǵylym mınıstrligi bul jaǵdaılarǵa jedel nazar aýdaryp, olqylyqtardyń ornyn toltyrdy. UBT ótýine monıtorıng jasaýǵa qatysqan 482 adam Arnaıy monıtorıng tobynyń múshesi», - deıdi ol.