Ár jarysqa úlken jaýapkershilikpen daıyndalamyn — álem chempıony Ulbolsyn Elmurat

TÚRKІSTAN. KAZINFORM — Bolgarııanyń Albena qalasynda ótken qol kúresinen eresekter arasyndaǵy álem chempıonatynda 16 jastaǵy shardaralyq sportshy Ulbolsyn Elmurat tarıhı jeńiske jetti. 

Fınalda ol 13 dúrkin álem chempıony, slovakııalyq Lýsııa Debranovamen kezdesip, tájirıbeli qarsylasyna esh múmkindik bermeı senimdi jeńiske qol jetkizdi.

Osylaısha qazaqtyń qarshadaı qyzy alǵash ret álem chempıony atanyp, el abyroıyn asqaqtatty.

— Qol kúrespen bes jyldan beri aınalysyp kelemin. Bul jeńis — men úshin úlken qýanysh. Kóp jylǵy eńbegimniń, ata-anam men bapkerlerimniń senimin aqtaǵanyma maqtanamyn. Ár jarysqa úlken jaýapkershilikpen daıyndalamyn. Bul joly da jaqsy daıyndyqpen jarysqa shyqtym, — dedi jas chempıon.

Ulbolsyn óz jetistigin týǵan jerindegi «Shardara Armsport» klýbynyń eńbegimen baılanystyrady.

— Bizdiń klýbtyń negizin qalaýshy Arman Qarsybaev árdaıym qoldaý kórsetip keledi. Sondaı-aq aǵa jattyqtyrýshylarymyz Nurjan Turaqulov, Ǵanı Malbasov, Seıfýlla Nurhalıkov, Asan Baıǵozıev, Darhan Asylbekovke jáne meniń jeke bapkerim — Merýert Qalyqulovaǵa alǵysym zor, — dep atap ótti ol.

Aıta keteıik, buǵan deıin Ulbolsyn Elmurat Qazaqstan jáne Azııa chempıonattarynyń, Álem kýbogynyń jeńimpazy atanǵan. Endi jas sportshy úlken sportta jańa belesterdi baǵyndyrýdy maqsat etip otyr.

Eske sala keteıik, budan buryn 16 jastaǵy qazaq qyzy qol kúresten 13 dúrkin álem chempıonyn jeńgenin jazǵan bolatynbyz.