Ár ujymdaǵy kadr bólimi qyzmetkerdi skrınıngke jiberýge mindetti — Aımaǵambetov
ASTANA. KAZINFORM — Búgin Senat «Qazaqstan Respýblıkasynyń keıbir zańnamalyq aktilerine eńbek zańnamasyn jetildirý máseleleri boıynsha ózgerister men tolyqtyrýlar engizý týraly» Zańdy maquldady. Osy oraıda bul qujatty ázirleýshilerdiń biri Májilis depýtaty Ashat Aımaǵambetov jańa normalarǵa qatysty túsinik berdi.
Atap aıtqanda, zań QR Parlamenti depýtattarynyń bastamashyldyǵymen ázirlengen. Zańnyń negizgi maqsaty — jumyskerlerdiń quqyqtaryn qorǵaý kepildikterin kúsheıtý, áleýmettik áriptestikti damytý, eńbek qaýipsizdigi standarttaryn arttyrý jáne eńbek qatynastarynyń negizgi rásimderin naqtylaý jónindegi eńbek zańnamasyn odan ári jetildirý.
— Búgin Senat áriptesimmen birge ázirlegen zańymyzdy maquldady. Bul — adamdardyń jyldar boıy kezigip kelgen naqty máselelerine berilgen jaýap. Zańnyń avtory retinde barlyǵyn ret-retimen, qarapaıym tilmen túsindirip bereıin. Birinshiden, skrınıng — jumys berýshiniń esebinen. Kóbi jalaqydan qaǵylmaý úshin arnaıy skrınıngke barýǵa qorqady. Jumys berýshi sizdi ortasha jalaqyńyzdy saqtaı otyryp, 3 kúnge deıin skrınıngke jiberýge mindetti. Endi eGov nemese SMS arqyly «tekseriletin ýaqyt keldi» dep habarlama keledi. Al kadr qyzmeti qyzmetkerdi skrınıngke jiberýi tıis. «Bilmedim» nemese «jibermedi» degen syltaý endi júrmeıdi. Bolmasa — jaýapkershilik. Biz másele kótersek, ony zańdaǵy naqty normalar arqyly sheshemiz, — dep jazdy áleýmettik jelidegi paraqshasynda Ashat Aımaǵambetov.
Sonymen qatar depýtat aýysym aldyndaǵy tekserýge biraz ýaqyt jumsalatynyn aıtty. Júrgizýshiler men zaýyt jumysshylary tekserýden ótý úshin saǵattap kezekte turady. Buryn bul ýaqyt tólenbeıtin. Jańa norma aıasynda aýysym aldyndaǵy tekserý mindetti bolsa, onda ol jumys ýaqyty retinde esepteledi. Ol esepke alynyp, tólenýi tıis. Bul norma kásiporyndardy protsesti avtomattandyrýǵa yntalandyrady nemese kezekte turǵan ár saǵat úshin aqy tóleýge týra keledi.
— Kishkene qatelik úshin adamdy birden jumystan shyǵarýǵa bolmaıdy. Zań jumys berýshini jaza qoldanarda teris qylyqtyń aýyrlyǵyn, mán-jaıdy jáne qyzmetkerdiń ókinetinin eskerýge mindetteıdi. Jaza jasalǵan iske saı bolýy kerek, — dedi Ashat Aımaǵambetov.
Budan bólek ol eńbek jaǵdaılary tek jazbasha tártipte ózgeretinin atap ótti. Jalaqy, grafık, jumys orny — kez kelgen ózgeris tek jazbasha nemese ETsQ arqyly jáne 15 jumys kúninen keshiktirilmeı habarlanýy tıis. Aýyzsha «erteńnen bastap basqasha isteısiń» degenniń zańdy kúshi joq.
— «Bolnıchnyıdaǵy» tuzaqtarǵa jol joq. Eger siz aýyryp júrgende eńbek shartynyń merzimi aıaqtalsa, sizdi jumystan shyǵara almaıdy. Shart aýrýhana paraǵy aıaqtalǵansha uzartylady, — dep naqtylady depýtat.
Munymen qosa zańda jumystan shyǵý erkindigi eskerilgen. Jumystan ketkińiz kelse, shyǵa beresiz. Jumys berýshi materıaldyq jaýapty adamdardy «is qabyldap alý» degen syltaýmen sheksiz ustap otyrýǵa quqyǵy joq. Bir aıdyń ishinde is ótkizýdi uıymdastyryp, sodan keıin qujattary men tolyq esebin berýge mindetti.
— Ákimdikter eńbek tynyshtyǵyna jaýapty. Óńirlik bılik eńbek daýlarynyń aldyn alýǵa jáne komıssııalardyń jumysyna zańmen mindetteldi… Ar-namys pen abyroı zań qorǵaýynda. Biz alǵash ret Eńbek kodeksinde qyzmetkerdiń ar-namysyn, qadir-qasıetin qurmetteý jáne jeke ómirine qol suǵylmaý quqyǵyn bekittik. Basshylyq tarapynan dórekilik, býllıng nemese jeke isterge aralasý oqıǵalary endi zańdy buzý deregi retinde sanalady. Bul zań qarapaıym adamdy qorǵaýǵa arnalǵan. Biz qural berdik, endi árqaısymyz óz quqyǵymyzdy bilýimiz mańyzdy, — dedi Ashat Aımaǵambetov.
