Ár synyp Zoom qosymshasy arqyly jeke-jeke sońǵy qońyraý sharasyn ótkizdi – Nazym Abaǵanova
ALMATY. QazAqparat – Almaty mektepterinde onlaın sońǵy qońyraý syńǵyrlady. Esten ketpeıtin erekshe shara týraly ıAasaýı atyndaǵy №123 mektep dırektorynyń oqý isi boıynsha orynbasary, Bek Air ushaq apatynda aman qalǵan Nazym Abaǵanova Mamyrbekqyzy oıymen bólisti, dep habarlaıdy QazAqparat tilshisi.
Onyń aıtýynsha, karantın aıasynda 2 aılyq onlaın bilim berý formaty eldegi bilim salasy úshin úlken synaq boldy.
«Onlaın bilim berý bolashaqtyń enshisindegi dúnıe bolǵanmen, búgin erteń keleri anyq edi. Alaıda aıaq astynan osy formatqa kóshý bizder úshin úlken tájirıbe bolǵany ras. Ekinshi jaǵynan jańa júıeniń kemshilikteri, olqy tustaryn paıymdadyq. Onlaın oqytýdyń qandaı tıimdi tustary baryn, álde de qaı jaǵynan damytý kerektigin túsindik. Bul úlken jumys, aýqymdy shara – muǵalimderdiń eńbegin aıqyn kórsetti. Oǵan kóptegen ata-analarymyzdyń hattary, habarlamalary kýá bola alady. Mektep qabyrǵasynda júrgendeı bolmasa da, barynsha bilim nárimen sýsyndatýǵa tyrystyq. Bul jerde balanyń obektıvti bilim alǵany tek muǵalimge baılanysty emes, ata-ananyń da múddesi bolyp tabylady. Kóptegen ata-analar balalarynyń biliminiń qaı jaǵynan basymdyq berýin túsindidep oılaımyn», - dedi Nazym Abaǵanova.
Pedagog mektepterdegi sońǵy qońyraýdyń mańyzdylyǵyn da atap ótti. 38 jyl boıy bilim salasynda qyzmet etip kele jatqan Nazym Abaǵanova oqýshylaryna betpe-bet jyly lebiz bildire almaǵanyna kóńili bosaıtynyn aıtty.
«Sońǵy qońyraýda barlyǵymyzdyń kóńilimiz bosaǵany anyq. Ár synyp Zoom qosymshasy arqyly jeke-jeke sońǵy qońyraý sharasyn ótkizdi. Bizdiń mektepte 2500-den asa oqýshy bilim alyp jatyr. Al mektepti 98 bala bitirip, qanatyn qaǵyp úlken ómirge joldama alyp jatyr. Olardyń attestat alý saltanaty maýsymnyń 3-4 kúnderine josparlanǵan. Epıdemıologııalyq talaptarǵa sáıkes 50 baladan asa jınalýǵa bolmaıtyndyqtan, biz attestat tapsyrý sharasyn 2 kúnge bóldik. QR BǴM buıryǵyna sáıkes, úlken aýdıtorııa, merekelik saýyq keshteri bolmaıdy», - dedi Nazym Abaǵanova.
Aıta ketý kerek, Nazym Mamyrbekqyzy - byltyr jeltoqsanda bolǵan ushaq apatynda aman qalǵan jolaýshylardyń biri.
Pedagog Jyl muǵalimi syılyǵynyń jeńimpazy atanyp, mınıstrlikten marapat alýǵa ushyp bara jatqanda Bek Air ushaǵynda apatqa ushyraǵan edi.
Keıin ol qalaı aman qalǵany jóninde QazAqparat tilshisine aıtyp bergen bolatyn.
