Ár sekýndtyń qadirin bilýdi úırendim – soltústikqazaqstandyq polıtseı Azat Zeınolov
PETROPAVL. QazAqparat – Petropavl Polıtsııa basqarmasynyń patrýldi polıtseıi Azat Zeınolov kúndelikti qyzmeti barysynda onǵa jýyq adamdy ajaldan qutqardy. Onyń ishki ister organdarynda jumys istep jatqanyna nebary alty jyl, dep habarlaıdy QazAqparat tilshisi.
Ótken jeksenbi kúni aǵa leıtenant Azat Zeınolov mingen «Suńqar 351» avtopatrýline jedel basqarý ortalyǵynyń kezekshisinen Esil ózenindegi kópirde er adamnyń qorshaý syrtyna shyqqan ekinshi adamdy ustap turǵany jaıly habar túsedi. Oqıǵa ornyna jetken polıtseıler kópirden sekirmek bolǵan er adamdy jol-jónekeı ótip bara jatqan Toyota Camry avtokóligi júrgizýshisiniń ustap qalǵanyn anyqtaıdy. Birden kómekke umtylǵan tártip saqshylary, óz-ózine qol jumsamaq bolǵan 52 jastaǵy qala turǵynyn úsheýlep júrip qutqaryp qaldy.
«Sol qarbalas sátte adamdy qutqaryp, bizge kómektesken júrgizýshiniń qolyn alyp, alǵys aıtyp ta úlgermedik. Esimi Aleksandr ekenin bilemin, naǵyz azamat eken. Ol er adamǵa sekirýge jol bermeı, áńgimelesip, kóńilin aýlady. Al jalpy adamdar kúızeliske boı aldyrmaı, bir-birine qol ushyn sozyp, problemalarymen bólisý qajet dep oılaımyn. Eresek adamdar jaqyndaryna aýyr tıetin áreket jasamaýy tıis», - deıdi Azat Zeınolov.
Polıtseıler túrli jaǵdaıda adam ómirine arasha túsip, óz bastaryn qaterge tigip, turǵyndardy qutqaryp jatady. Alaıda, onyń kópshiligi sol kúıinde eskerýsiz qalady. Óıtkeni tártip saqshylary úshin bul – qalypty jaǵdaılardyń biri. SQO Polıtsııa departamenti baspasóz qyzmetiniń málimetinshe, osyndaı oqıǵalardyń biri byltyr jazda boldy. Petropavlda bes qabatty úıde órt shyǵyp, habar túsisimen ol jerge qyzmet atqaryp júrgen Azat Zeınolov ta jetedi. Tútinge oranǵan páterden jylaǵan balalardy birden tabý múmkin bolmapty. Órt sóndirýshilermen birge kómekke umtylǵan polıtseı eki balany saty arqyly túsirýge kómektesip, olardyń anasy – mas áıeldi janǵan baspanadan kóterip shyǵarady.
Al tamyz aıynda Azat Zeınolov áriptesteri Erik Qusaıynov jáne Qýanysh Súleımenovpen birge er adamdy ólim aýzynan alyp qaldy.
«102» nómirine Petropavldaǵy Internatsıonal kóshesindegi garajdardyń biriniń esigi ashyq jatqandyǵy jaıynda habar túsedi. Jedel basqarý ortalyǵynyń kezekshisi oqıǵa ornyna «Suńqar 351» avtopatrýlin baǵyttaıdy. Azat qasyndaǵy áriptesi Qýanysh Súleımenovpen birge garajdyń jerqoımasynda es-tússiz jatqan ekeýdi tabady. Er adamdar jerqoımanyń qabyrǵasyn kýzbasslakpen syrlamaq bolǵan eken. Ótkir ıisti sezgen saqshylar kómekke vzvod komandıri Erik Qusaıynovty shaqyrady. Iisten ýlanǵandardy qutqarýǵa polıtsııaǵa habar bergen turǵyn da kómektesedi.
«Qutqarýshylardy kútýge ýaqyt tyǵyz boldy. Mundaıda ár sekýnd altynnan da qymbat. Zardap shekkenderdi alyp shyǵý úshin asa qaýipti bolsa da jerqoımaǵa túsýge týra keldi. Garajdan porolonnan jasalǵan maskany taýyp kıip, tómenge tústim. Birinshi bireýin arqanmen baıladym. Áriptesterim ony shyǵaryp jatqan kezde dalaǵa shyǵyp taza aýa juttym. Óıtkeni ıisten tunshyǵa bastadym. Keıin ekinshisin de arqanmen shyǵardyq», - dep eske alady sol oqıǵany Azat Zeınolov.
Polıtseıler er adamdarǵa alǵashqy medıtsınalyq kómek kórsetpek bolǵanymen, nátıje shyqpaıdy. Jedel járdem qyzmeti zardap shekkenderdi aýrýhanaǵa jetkizip, bireýi sonda esin jımastan qaıtys boldy. Ekinshisiniń tek bir aptadan keıin ǵana beti beri qarady.
28 jastaǵy Azat Zeınolovtyń ishki ister organdarynda eńbek etip júrgenine bıyl altynshy jyl. Kúres, gir sporty, qol kúresimen aınalysatyn jigitke dene jattyǵýlarynyń kúndelikti qyzmetinde kómegi kóp. Máselen úsh jyl buryn ol qasyndaǵy seriktesimen birge kólik apatynan keıin mashına ishinde qystyrylyp qalǵan úsh adamdy alyp shyǵyp, qutqardy.
Merekeler qarsańynda erligimen erekshelengen bir top polıtseıdi, sonyń ishinde Azat Zeınolovty Іshki ister mınıstri Erlan Turǵymbaev quttyqtap, alǵysyn bildirdi.
