Ár sekýnd mańyzdy: ShQO qutqarýshylary osy jyldaǵy erekshe qutqarý operatsııalary týraly aıtyp berdi
2022 jyldyń basynan beri ShQO Tótenshe jaǵdaılar departamentiniń qyzmetkerleri ishten qulyptanyp qalǵan 440 esikti ashyp, sheshilmeı qalǵan 17 saqınadan adam saýsaǵyn bosatyp berdi. Qyzyǵynan qıyndyǵy basym osy jumystyń bıylǵy jylyn qorytyndylaı kele qutqarýshylar erekshe jáne kúlkili jaǵdaılardy eske aldy.
«Birde Óskemende balanyń saýsaǵy uıaly telefon korpýsyna qysylyp qalǵany týraly habar tústi. Ata-anasy óz betimen kómektese almaǵan soń qutqarýshylardy shaqyrdy. Oqıǵa ornyna kelgen TJD mamandandyrylǵan jasaǵynyń qyzmetkerleri arnaıy quraldardyń kómegimen qaqpaqty qysyp kóterip, balanyń saýsaǵyn bosatty», - delingen ShQO TJD baspasóz qyzmeti taratqan aqparatta.
Mektepte onynshy synyp oqýshysynyń saýsaǵy kranǵa keptelip qalǵan. Qutqarýshylar krandy kesip, oqýshynyń saýsaǵyn shyǵaryp berdi.
Balanyń aıtýynsha, úziliste ol saýsaǵyn shúmekke salamyn dep osyndaı jaǵdaıǵa tap bolǵan. Muny baıqaǵan synyptasy muǵalimge habar bergen. Sodan soń ustazy TJD-ǵa habarlasty.
«112» qyzmetine kezekti shaqyrý tústi. Oqıǵa ornyna kelgen qutqarýshylar jertólege qulaǵan 1946 jylǵy qart adamdy tapty. Belgili bolǵandaı, ol sonda qulap, ózdiginen shyǵa almaı, kómek surap aıqaılaǵan. Kýágerler ony estigen soń dereý TJ qyzmetine qońyraý shaldy. Qutqarýshylar jábirlenýshini jertóleden shyǵardy», - delingen málimette.
Shemonaıha aýdanynyń ortalyǵyndaǵy Vokzalnaıa kóshesinde jylý trassasynda adam qystyrylyp qalǵan. Jábirlenýshini ótip bara jatqan balalar baıqap, qutqarýshylarǵa habar berdi.
«Onyń aıaǵy qubyrlardyń arasyna qysylyp qalǵan eken. №28 órt sóndirý bólimshesiniń qyzmetkerleri arnaıy quraldardyń kómegimen qubyrdy bosatyp, er adamdy alyp shyqty. Azamat aıazda jylynbaq bolyp, qıyn jaǵdaıǵa tap bolǵan», - delingen habarlamada.
Foto: ShQO Tótenshe jaǵdaılar departamenti