Ár pedagog balalardy óz emotsııasyn ustaýǵa, durys sheshim qabyldaýǵa úıretýi kerek - Prezıdent
ASTANA. KAZINFORM - Jas urpaq arasyndaǵy narkotızmge qarsy is-qımylǵa búkil qoǵam bolyp jumylý kerek. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty.
- Balalar ómirlik daǵdynyń kóbin mektepte meńgeredi. Olar munda tártipke baǵynyp, júrip-turý erejeleri men ádep normalaryn saqtaýdy úırenedi. Sondyqtan mektep ózara qurmet pen janashyrlyqqa toly úılesimdi qoǵamnyń úlgisi bolýǵa tıis. Balalardy jaýapkershilikke baýlyp, olarǵa kez kelgen árekettiń saldary bolatynyn túsindirý mańyzdy. «Zań men tártip» qaǵıdaty tárbıe jumysynyń ajyramas bólshegine aınalýǵa tıis. Eń basty mindet – osy tujyrymdamanyń mán-mańyzyn túsinikti tilde, ozyq pedagogıkalyq ádister arqyly óskeleń urpaqtyń sanasyna sińirý. Bul iske dırektordyń tárbıe jumystary jónindegi orynbasary, synyp jetekshileri men mektep psıhologterinen bólek, barsha ustazdar qaýymy atsalysýǵa tıis. Óıtkeni bul – memlekettik mańyzy bar mindet, - dedi Qasym-Jomart Toqaev.
Memleket basshysy balalardy áleýmettik keselderden qorǵaý úshin olardyń synı oılaý qabiletin ushtaý qajettigin basa aıtty.
- Jas urpaqtyń kóp ýaqytyn Internet pen áleýmettik jelilerde ótkizetini jasyryn emes. Olar jalǵan ıdeıalar men minez-qulyqty buzatyn teris tárbıeniń yqpalyna ońaı túsýi yqtımal. Sol sebepti ár pedagog balalardy óz emotsııasyn ustaýǵa, kez kelgen nársege nemese jaǵdaıǵa baıyppen qarap, durys sheshim qabyldaýǵa úıretýi kerek, - dedi Memleket basshysy.
Qasym-Jomart Toqaev nashaqorlyq pen lýdomanııa, turmystyq zorlyq-zombylyq, býllıng jáne buzaqylyq syndy zııandy ádettermen kúresýde muǵalimder aıryqsha ról atqaratynyn atap ótti.
- Jas urpaq arasyndaǵy narkotızmge qarsy is-qımylǵa búkil qoǵam bolyp jumylý kerek. Men bul týraly jaqynda Qaýipsiz Keńesiniń otyrysynda aıttym. Biraq, eń bastysy, ártúrli stımýlıatorlarmen áýestený, tipti ol zııansyz bolsa da, túbi jarǵa jyǵatynyn balalar men jastarǵa túsindirý qajet. Zııandy zattardy tutyný nemese vırtýaldy oıyndar arqyly shyndyqtan ajyrap, qııalǵa erik berý adamdy aınalasyna jeksuryn qylyp, qoǵamnan shettetedi.
Shyn máninde, mundaı jandar óz bolashaǵyna balta shabady. Olar jaqsy jumys taýyp, berekeli otbasyn qurý múmkindiginen aıyrylady. Óziniń darynyn kórsetip, bıik maqsattarǵa jete almaıdy, - dedi Prezıdent.
Memleket basshysynyń paıymynsha, muǵalimder memlekettik mańyzy bar jumysty atqaryp jatyr.
Degenmen, ustazdyń nazary bala oqytý isinde bolýǵa tıis.