Ár ótinish artynda adam taǵdyry tur — Prezıdent halyqtan túsetin ótinishterge aıryqsha nazar aýdarýdy tapsyrdy

ASTANA. KAZINFORM — Byltyr Prezıdent Ákimshiligine 50 myńnan astam ótinish kelip túsken, al elimizdegi barlyq memlekettik organdarǵa shamamen 4 mıllıon ótinish joldanǵan. 

Prezıdent Qasym-Jomart Toqaev bul ótinishterge aıryqsha kóńil bólýdi tapsyrdy. Prezıdenttiń aıtýynsha, memlekettik apparattyń basty mindeti — azamattardy tolǵandyratyn ózekti máselelerdi sheshý. Ol úshin, eń aldymen, azamattarmen udaıy baılanysta bolý kerek.

− Sondyqtan halyqtan kelip túsetin ótinishterge aıryqsha nazar aýdarý qajet. Byltyrdyń ózinde Prezıdent Ákimshiligine 50 myńnan astam ótinish kelip túsken, al elimizdegi barlyq memlekettik organdarǵa shamamen 4 mıllıon ótinish joldanǵan. Bul kórsetkish jyldan-jylǵa kóbeıýde. Bir jaǵynan, bul jurttyń «Halyq únine qulaq asatyn memleket» tujyrymdamasyna senetinin kórsetedi. Sonymen qatar bul olardyń ótinishteri men máseleleri memlekettik organdardyń kúndelikti jumysynda sheshimin tappaı jatqanyn ańǵartady, − dedi Memleket basshysy Úkimettiń keńeıtilgen otyrysynda.

Sondyqtan Prezıdent olqylyqtar men kemshilikterdi joıý úshin tııanaqty jumys júrgizýdi tapsyrdy.

− Ádette azamattardyń ótinishteriniń artynda adam taǵdyry turady, sondyqtan, bul jerde barlyq quzyrly organdar jumyla jumys isteýge tıis, — dedi Qasym-Jomart Toqaev.

Eske salsaq, osyǵan deıin Prezıdent «Ákimder mektebi» jobasyn iske qosýdy tapsyrǵanyn jazdyq.

Sonymen qatar Toqaev tehnıkalyq-kásiptik bilim berý júıesin túbegeıli jańǵyrtý kerek ekenin alǵa tartty.