Ár otbasynyń jeke dárigeri bolýyn qolǵa alýdamyz - Eljan Birtanov
«Elbasy aıtyp ótkendeı, aldymen qolǵa alatyn dúnıe ol alǵashqy medıtsınalyq jáne ambýlatorııalyq kómek. Onyń sebebi de túsinikti, damyǵan elderde dárigerlerdiń kómeginiń 80%-y ol alǵashqy medıtsınalyq kómek kezinde usynylady», - dedi E.Birtanov.
Sondaı-aq, mınıstr densaýlyq saqtaý salasyna bólinetin qosymsha qarajattyń 40 paıyzdan 60 paıyzǵa arttyrýǵa qatysty da toqtalyp ótti.
«60%-ǵa deıin ósirý degenimiz ol ár adamdy, otbasyn jeke dárigermen qamtamasyz etý degen sóz. Biz bul baǵytta árbir otbasynyń jeke dárigeri bolýyn qazirden qolǵa alýdamyz. Sondaı-aq, jedel járdemniń jyldamdyǵyn arttyrý úshin qaladaǵy kópqabatty úılerdiń birinshi qabatynda shaǵyn dıspanserlik ortalyq bolýy tıis. Búgingi tańda bul baǵytta jospar jasalyp, barlyq óńirlermen bekitildi. Bul ortalyqtar memlekettik-jekemenshik áriptestik negizinde salynyp, júzege asyrylatyn bolady», - dedi mınıstr.
Mınıstrdiń aıtýynsha, sonda ǵana medıtsına qyzmetiniń sapasy men qoljetimdiligi artady.
Aıta ketsek, búgingi «Nur Otan» partııasynyń kezekti sezinde Elbasy densaýlyq salasyn damytýǵa qosymsha 120 mlrd teńge qarjy bólýdi tapsyrdy.