Ár otbasynyń jeke áleýmettik kartasy jasalyp jatyr - Berdibek Saparbaev

NUR-SULTAN. QazAqparat - Búgin Nur-Sultan qalasynyń ákimi Baqyt Sultanov jáne QR Eńbek jáne halyqty áleýmettik qorǵaý mınıstri Berdibek Saparbaev elordanyń az qamtylǵan jáne kópbalaly otbasylarymen kezdesti, dep habarlaıdy QazAqparat tilshisi.

«Buryn otbasynyń tabysyn eseptegen kezde olardyń balalary úshin alatyn járdemaqysy, sondaı-aq «Altyn alqa», «Kúmis alqa» úshin jáne múgedek bala úshin alatyn járdemaqy, sol sııaqty stıpendııa, odan keıin jergilikti ákimdikten beriletin aqshalaı járdemaqylardyń barlyǵy esepteletin edi. Osy jyldyń 1 sáýirinen bastap ol esepteýlerdi alyp tastadyq. ıAǵnı ataýly áleýmettik kómek jáne basqa da memlekettik qoldaý kórsetiletin kezde joǵaryda atalǵan járdemaqy túrleri esepke kirmeıdi. Elbasy bizge aldymen kómekke muqtaj otbasylarǵa qoldaý kórsetý kerektigin basa aıtty. Osy maqsatta qazirgi kúni jergilikti atqarýshy bılik ókilderimen birigip, árbir otbasynyń jeke áleýmettik kartasyn jasaýdamyz. Bul tapsyrmany osy jyldyń 1 shildesine deıin bitirýimiz kerek, dál qazir onyń 30% daıyn. Tolyq jasap bolǵanda otbasylarǵa áleýmettik qoldaý kórsetý boıynsha odan arǵy baǵytymyzdy aıqyndaıtyn bolamyz», - dedi B.Saparbaev.

Sondaı-aq, mınıstr jańa bıznes ıdeıalardy iske asyrý úshin aýylda turatyn kópbalaly otbasylarǵa jáne jastarǵa memlekettik granttar beriletinin sóz etti.

«Osy jyly qolǵa alynyp jatyrǵan atalǵan sanatqa jatatyn otbasylardy qoldaýdyń taǵy bir túri ol óz kásibimdi ashamyn degen azamattarǵa granttar men mıkrokredıtter berý. Mysaly, bıyl óz kásibimdi dóńgeletemin degen 10 myń adamǵa 500 myń teńge kóleminde qaıtarymsyz grant beriledi, budan bólek shaǵyn jáne orta kásipkerlikpen aınalysamyn degen jandar úshin 500 myń teńgeden 6,5 mln teńgege deıin shaǵyn nesıe berý qarastyrylýda. Taǵy bir aıtyp ketetin jaıt, kópbalaly analar men múgedek bala tárbıelep otyrǵan analar úshin úıinde áleýmettik jumys oryndaryn ashý jáne suranysqa ıe kásipterge qysqa merzimdi oqytý uıymdastyrylady. Bunyń sebebi bul analar bala kútimine baılanysty úıden shyǵa almaıdy sondyqtan jaǵdaıdy úılerine aparyp jasaýdamyz», - dedi ol.

Odan bólek, B. Saparbaev qazirgi tańda mınıstrlik otbasylarǵa áleýmettik qyzmetter men qoldaý sharalarynyń 11 bólikten turatyn biryńǵaı paketi qurastyrǵanyn aıtyp berdi.

1. 1-4-synyp oqýshylaryn tegin ystyq tamaqpen qamtamasyz etý;

2. Balalar men analardyń qoǵamdyq kólikte jeńildikpen júrýin qamtamasyz etý;

3. Mektep formasymen, oqýlyqtarmen jáne oqý kerek-jaraqtarymen qamtamasyz etý;

4. Balabaqshadaǵy orynǵa basymdy quqyq berý;

5. Balalar lagerlerinde tegin demalý;

6. Kommýnaldyq qyzmetter boıynsha ótemaqy tólemderi, kómirmen jáne otynmen qamtamasyz etý;

7. Gaz analızatorlaryn, jaryq pen sý esepteýishterin tegin ornatý;

8. Kópbalaly otbasylar úshin úıde arnaıy jumys oryndaryn qurý, granttar men shaǵyn nesıeler berý;

9. Barlyq eńbek etýge qabiletti AÁK alýshylardy jumyspen qamtý sharalary (oqytý, jumysqa ornalastyrý, jastar praktıkasy, granttar men);

10. Turǵyn úı qurylys jınaqtary júıesi arqyly turǵyn úı jaǵdaıyn jaqsartý;

11. Birjolǵy áleýmettik kómek kórsetý.