Ár onynshy qazaqstandyq úshin ınternet qoljetimdi emes – depýtat
«Qazaqstandaǵy tsıfrlandyrýdyń negizi - jańa tsıfrlyq tehnologııalardy qoldaný arqyly el ómiriniń barlyq salalaryn tsıfrlyq túrlenýdi jedeldetýge múmkindik beretin «Tsıfrlyq Qazaqstan» baǵdarlamasy. Osy baǵdarlamanyń bes baǵytynyń úsheýi QR aýmaǵynda jyldam ári qaýipsiz ınternettiń, sondaı-aq sapaly uıaly baılanystyń qoljetimdi bolýyn qamtamasyz etýge qatysty boldy. Bul mindet elimizdegi 117 qalada oryndaldy, onyń ishinde 10,4 mln. turǵyny bar 88 qala men 29 aýyl bar. Al aımaqtardaǵy eldi mekenderge qatysty bulaı aıta almaımyz», - dedi Maıra Aısına QR Ádilet mınıstrligindegi «Aýyldyq eldi mekenderde Internetke qol jetimdilikti qamtamasyz etý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyn talqylaýǵa qatysty vedomstvoaralyq komıssııa otyrysynda.
Onyń aıtýynsha, 250 jáne odan kóp adam turatyn 800 aýylda ınternet joq.
«Elimizdi ınternetpen qamtamasyz etýge shırek ǵasyr ketti. Endi memlekettiń mindeti – qaı jerde turatynyna qaramastan, barlyq qazaqstandyq úshin ІT tehnologııasy qoljetimdi bolýyn qamtamasyz etý. Eger osy qarqynmen júre bersek, bizge taǵy qansha jyl kerek ekenin boljaý qıyn bolady. Sondyqtan barynsha qysqa merzim ishinde elimizdegi 250 jáne odan kóp adam turatyn 800 aýylǵa ınternet qosýymyz kerek. 2022 jyldyń aıaǵynda 50 jáne odan kóp adam turatyn 885 aýylǵa ınternet qosýymyz kerek», - deıdi ol.
Demek, sońǵy eki jylda halyqtyń 97%-yn ınternet jelisine qosý kerek.
«Búgingi tańda 720 memlekettik qyzmet elektrondy formatta qoljetimdi. Bul qyzmet túrlerin ınterneti barlar ǵana ala alady. Al qazirgi ýaqytta árbir onynshy qazaqstandyqta mundaı múmkindik joq», - deıdi depýtat.
