Ár óńirde ákimderdiń basshylyǵymen Óńirlik ınvestıtsııalyq shtabtar qurylady
ASTANA. KAZINFORM — Ár óńirde ákimderdiń basshylyǵymen Óńirlik ınvestıtsııalyq shtabtar qurylady. Bul týraly Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Investıtsııalardy tartý boıynsha ekojúıeni jetildirý maqsatynda «ınvestor joldaryn» reglamentteý, sondaı-aq osy protseste barlyq memlekettik organdardyń rólin aıqyndaý boıynsha jumystar júrgizilýde. Investorlardy izdeýden bastap jobalardy aıaqtaýǵa deıin, onyń ishine bıýrokratııalyq kedergilerden ótý jáne kvazımemlekettik sektor tarapynan járdemdesýdi qosa alǵanda, ınvestıtsııalyq tsıkldy tolyq súıemeldeý qamtamasyz etiletin bolady», - dedi ol.
Mınıstrdiń aıtýynsha, Investıtsııalyq shtabpen uqsastyq boıynsha ár óńirde ákimderdiń basshylyǵymen Óńirlik ınvestıtsııalyq shtabtar qurylady. Olardyń quramyna jergilikti atqarýshy organdardyń basshylary, Kazakh Invest, «Atameken» Ulttyq kásipkerler palatasynyń, arnaıy ekonomıkalyq aımaqtyń jáne ındýstrııalyq aımaqtyń, prokýratýra men salyq organdarynyń óńirlik ókilderi kiredi. Bul ınvestorlardyń problemalaryn «osynda jáne qazir» qaǵıdaty boıynsha jedel sheshýge múmkindik beredi.
«Bul tásil 2029 jylǵa deıingi Investıtsııalyq saıasattyń ózekti tujyrymdamasynda kórinis tabady. Sonymen qatar, ınvestıtsııalardy tartý boıynsha targettelgen jumys úshin óńirler men jergilikti bıznestiń qajettilikteri men básekelestik artyqshylyqtaryn eskeretin Óńirlik ınvestıtsııalyq baǵdarlamalar negizinde «ınvestıtsııalarǵa tapsyrystar» qalyptastyrylatyn bolady», - dedi Nurlan Baıbazarov.
[
