Ár óńirden jınalǵan sýretshiler Tarazdyń tabıǵatyn beıneleýde
TARAZ. QazAqparat - Jambyl oblysynda mádenıet, arhıvter jáne qujattama basqarmasynyń uıymdastyrýymen «Áýlıeata boıaýlary» І halyq shyǵarmashylyǵy festıvali ótýde, dep habarlaıdy QazAqparat tilshisi.
Shara eki kezeńnen turady. 31 mamyr men 6 maýsym aralyǵyn qamtyǵan alǵashqy kezeńde uıymdastyrýshylar kelgen qonaqtarǵa qalanyń tarıhı-mádenı oryndaryn aralatyp, ekskýrsııa jasady. Ekskýrsııa barysynda sýretshiler ózderine unaǵan, shyǵarmalaryna arqaý bolatyn oryndardy tańdady.
«Festıvaldiń birinshi kezeńi aıasynda qatysýshylar ózderi tańdaǵan oryndaryn beıneleıdi. Olar Qarahan - Baba, Aısha bıbi, Aqyrtas qalashyǵy, Kóne Taraz tarıhı-mádenı orny jáne Jeńis saıabaǵy sekildi kórnekti oryndardy tańdady. Qylqalam sheberleri aýdandarǵa sapar shegip, ózderine berilgen aýmaqtardyń kelbetin keskindeýde», -dedi oblystyq halyq shyǵarmashylyǵy ortalyǵynyń dırektory Ǵanı Sadyrbaev.
Nur Sultan, Almaty qalalary men Batys Qazaqstan, Qaraǵandy, Pavlodar, Shyǵys Qazaqstan, Jambyl oblystarynan kelgen sýretshiler Tarazdyń tabıǵaty men tarıhı-mádenı oryndary beınelengen jalpy sany 40 kartına salady.
Al ekinshi kezeń 7 maýsymda ótedi. Osy kúni is-sharanyń saltanatty jabylýy, marapattaý rásimimen qatar, B.Momyshuly atyndaǵy «Jeńis» saıabaǵynda ashyq aspan astyndaǵy kórme uıymdastyrylyp, plenerge qatysýshy sýretshilerdiń shyǵarmalary men ólkege belgili qolóner sheberleriniń jáne fotosýretshilerdiń tyń týyndylary qoıylatyn bolady.
