Ár óńirdegi uıymdasqan toptar zorlyq-zombylyqqa bir mezgilde kóshken – Bas prokýratýra
«Qazir tergeý oryn alǵan oqıǵalardyń qalaı bolǵanyn anyqtaýda. Bastapqy kezeńde narazylyq bildirýshiler ózderin beıbit ustady. Ol jerlerde qarapaıym qyzyǵýshylyq tanytqandar, ótip bara jatyp toqtaǵandar da kóp bolǵan. Aıaǵy tártipsizdikke aınalady dep eshkim oılamaǵan. Alaıda, keıinnen olardyń arasyna qylmystyq elementter men buzaqylar qosylyp, bastamany óz qoldaryna alyp, belsendi áreketterge ıtermeleı bastady.
Sonymen qatar WhatsApp jáne Telegram arqyly, ásirese 4-5 qańtar kúnderi tártipsizdikterge qatysýshylardyń jınalý oryndaryn, qozǵalý baǵyttaryn úılestirgen qazaqstandyq chattar aıqyndaldy. Mysaly, Almaty qalasynda sanaýly saǵattyń ishinde bir messendjerge qatysýshylar sany 140-tan 5,5 myńǵa deıin artty. Osyǵan uqsas Jambyl oblysynda – chatqa qatysýshylar sany 4 myńǵa deıin jetken. Sóıtip qysqa ýaqyt ishinde jınalǵan adamdar basqynshy toptarǵa aınalǵan»,- dedi Rızabek Ojarov Ortalyq kommýnıkatsııalar qyzmetindegi brıfıng barysynda.
Onyń atap ótýinshe, uıymdasqan toptar zorlyq-zombylyq jasaý kezeńine elimizdiń ár aımaqtarynda bir mezgilde kóshken. Birazy dúkenderdi talqandap, tonaýmen aınalysqan. Olar tipti turǵyn úılerdiń birinshi qabattarynda ornalasqan úı-jaılardy órtep jibermek bolǵan.
«Tek turǵyndardyń janqııarlyq toıtarys berý áreketteri ǵana budan da aýyr zardaptar men kóptegen qurbandardyń aldyn alǵan. Dál osy ýaqytta basqalary lańkestik shabýyldy jalǵastyra bergen. Olar aıtarlyqtaı kóp adam jınap, armatýra, taıaq, kirpish, tas jáne Molotov kokteılderimen qarýlanǵan. Olarǵa ǵımarattardy órteý úshin avtomobıl dóńgelekteri men benzın jetkizilgen. Odan keıin, aıtarlyqtaı sandyq artyqshylyqty paıdalana otyryp, qorshaýlardy buzyp, óńirlerdegi bıliktiń nyshany retindegi ákimdikter ǵımarattaryn basyp alýǵa kirisken. Olar qarý-jaraq qoımalaryn basyp alyp, atys qarýyn alý úshin polıtsııa ǵımarattaryna shabýyl jasap, soqqysh retinde qaýipsizdik kúshterinen tartyp alynǵan arnaıy tehnıka men kólikterdi, basqa da quraldardy paıdalanǵan. Urlanǵan qarý-jaraqty, azyq-túlik pen aýyz sýdy búlikshilerge jetkizý jáne taratý amaldaryn uıymdastyrǵan. Qarý-jaraqtyń búlikshilerge qalaı jetkizilgenin áleýmettik jelilerde keńinen taraǵan vıdeolardan kórýge bolady», - dedi ol.