Ár nárseniń sońy bolady - Ǵabıdolla Ábdirahymov shymkenttikterge alǵys aıtty

NUR-SULTAN. QazAqparat - Búgin qyzmetinen bosatylǵan Shymkent qalasynyń burynǵy ákimi Ǵabıdolla Ábdirahymov shymkenttikterge alǵys aıtty, dep habarlaıdy QazAqparat eks-ákimniń áleýmettik jelidegi paraqshasyna silteme jasap.

«Qurmetti Shymkent qalasynyń turǵyndary! Qymbatty dostar! Men úshin Shymkent qalasynyń ákimi bolyp jumys istegenim - úlken mártebe jáne maqtanysh. Osyndaı múmkinshilik bergen Elbasymyzǵa, Prezıdentimizge alǵys aıtamyn. Qoldan kelgenshe qalanyń damýyna áriptestermen birge atsalystym. Men Shymkent halqyna óte rızamyn. Sizder árqashan meni qoldadyńyzdar. Ózimdi óte baqytty adam retinde sezinip júrdim. Ár nárseniń sońy bolady bul ómirde. Jańalyqtar da bolady. Jańadan kelgen qala basshysyna sáttilik tileımin. Barlyqtaryńyzǵa úlken alǵys aıtyp, basymdy ıemin. Aman bolyńyzdar. Shymkent jaınaı bersin!», - dep jazdy Ǵabıdolla Ábdirahymov Instagram paraqshasyna.

Eske sala keteıik, búgin Memleket basshysynyń Jarlyǵymen Ǵabıdolla Ábdirahymov Shymkent qalasynyń ákimi laýazymynan bosatyldy. Onyń ornyna osy kúnge deıin Otyrar aýdanyn basqaryp kelgen Erlan Aıtahanov taǵaıyndaldy. Al Qyrymbek Kósherbaev Ǵabıdolla Ábdirahymovtyń bılik artqan senimdi aqtamaǵanyn aıtty.