Ár máseleni nazarǵa alyp, qadaǵalap otyrmyz - DIAQB baıqaýshylar mıssııasynyń basshysy

ASTANA. QazAqparat – Qazir Qazaqstan boıynsha bizdiń 350-ge jýyq baıqaýshymyz saılaý protsesin qadaǵalap jatyr. Bul týraly BAQ ókilderiniń qatysýymen ótken baspasóz maslıhatynda EQYU Demokratııalyq ınstıtýttar jáne adam quqyqtary jónindegi bıýrosynyń (DIAQB) saılaýdy qadaǵalaý jónindegi mıssııasynyń basshysy Oýen Merfı aıtty, dep habarlaıdy QazAqparat tilshisi.

«Biz baıqaý protsesin aqpanda bastadyq. Osy ýaqyttan beri ár máseleni nazarǵa alyp, qadaǵalap kelemiz. Bizdiń 350-ge jýyq baıqaýshymyz Qazaqstannyń barlyq óńirinde baıqaý júrgizýde. Biz osy aıdyń sońyna deıin osynda bolamyz. Óıtkeni, saılaýdan keıin aryz-shaǵym túsýi múmkin. Osy máselelerdi táýelsiz zerdeleý úshin jumysty odan ári jalǵastyra bermekpiz», - dep málim etti Oýen Merfı.

Onyń aıtýynsha, erteń saılaý protsesine qatysty aldyn ala qorytyndy shyǵarylady.

«Erteń biz EQYU Parlamenttik Assambleıasymen birlesip, ózimizdiń jumysymyzdyń aldyn ala qorytyndysyn jarııalaımyz. Óıtkeni, qazirgi tańda bizdiń ár óńirdegi baıqaýshylarymyz jedel aqparattarmen bólisip jatyr. Sondyqtan aldyn ala qorytyndyny erteń shyǵaramyz», - dep túıindedi Oýen Merfı.