Ár maman negizgi kásibimen qatar tsıfrlyq daǵdylardy jetik meńgerýi kerek — Prezıdent

ASTANA. KAZINFORM — Álemdik naryqta JI mamandaryna suranys arta beredi jáne qazaqstandyq mamandar álem qajetine jaraıtyn ozyq tehnologııalardy jasaýy kerek. Bul týraly Prezıdent Qasym-Jomart Toqaev Jasandy ıntellektini damytý jónindegi keńestiń alǵashqy otyrysynda aıtty.

Prezıdenttiń aıtýynsha, ýnıversıtetter jańa zamanǵa saı mamandar daıyndaýǵa tıis. Qazaqstannyń ınjenerleri, zertteýshileri jáne kásipkerleri búkil álemniń qajetine jaraıtyn ozyq tehnologııalardy oılap tabýǵa qabiletti bolýy kerek. 

— Jyl basynda elimizde AI-sana baǵdarlamasy iske qosyldy. Osy joba aıasynda 440 myńnan astam stýdent JI salasy boıynsha arnaıy sertıfıkatqa ıe boldy. Mundaı baǵdarlamalardyń paıdasy mol. Sebebi dál osyndaı alańdarda eń úzdik jobalar óz aldyna startap retinde qalyptasyp, halyqaralyq naryqqa shyǵa bastaıdy, — dep atap ótti Qasym-Jomart Toqaev.

Alaıda Prezıdent álemdik naryqta JI mamandaryna degen suranystyń óte joǵary ekenin umytpaýdy eske saldy. Jáne aldaǵy ýaqytta bul suranys tek óse bermek.

— Mundaı jaǵdaıda tipti bilim berý júıesiniń múmkindigi de shekteýli bolatyny anyq. Sol sebepti qazirgi ozyq tehnologııa dáýirinde ár maman ıesi óziniń negizgi kásibimen qatar, tsıfrlyq daǵdylardy jetik meńgerip, JI múmkindikterin jumys barysynda qoldana bilgeni jón, — dedi Memleket basshysy.

Aıta keteıik, elordada Memleket basshysynyń tóraǵalyǵymen Jasandy ıntellektini damytý jónindegi keńestiń alǵashqy otyrysy ótti.

Buǵan deıin Prezıdent Qasym-Jomart Toqaev elimizde jasandy ıntellekt salasyna mamandanǵan jańa zertteý ýnıversıtetin qurýdy tapsyrǵan edi.