Ár qazaqstandyq jylyna 42 keli plastık qoqys shyǵarady – Jasyl Arystan
«Jasyl Arystan» – jas jeke ekologııalyq uıym. Men jáne meniń pikirles dostarym elimizdiń ekologııalyq máselelerin sheshýge belsendi qatysýdy uıǵardyq. Bizdiń túrli salalarda tájirıbe men bilimimiz bar jáne biz únemi qorshaǵan ortany saqtaýǵa qatysty máselelerge tap bolamyz, sondyqtan bar kúshimizdi biriktirýdi sheshtik. Qyzmetimizdiń basty baǵyttarynyń biri – plastıkalyq buıym tutynýdy azaıtý jáne plastıkalyq qaldyqtardy durys kádege jaratý bastamasy. «Plastıkten taza Qazaqstan» jobasy aıasynda ǵylymı tásilder men álemdik tájirıbeler kómegimen densaýlyǵymyz úshin asa qaýipti plastıkalyq qaldyqtar máselesin jeńe alatynymyzǵa senemiz», - dedi «Jasyl Arystan» jeke qorynyń basqarma tóraǵasy Gúlnar Erejepova Ortalyq kommýnıkatsııalar qyzmetinde ótken brıfıngte.
Spıker sońǵy ýaqytta adamzattyń plastmassany tutyný kólemi on ese artqanyn atap ótti. Qazirgi ýaqytta álemde jylyna 400 mln tonnadan astam plastık óndiriledi.
1950-2018 jyldar arasynda 8,5 mıllıard tonna plastıkalyq buıym óndirilgen.
«Sarapshylardyń aıtýynsha, qazir álem boıynsha barlyq plastıkalyq qaldyqtyń 5-10% ǵana qaıta óńdeýge jiberiledi. 12% - órteledi, 79% - kúresinge jáne qorshaǵan ortaǵa tastalady. Plastıkalyq buıymdardyń uzaq saqtalatynyn eskersek (500 jylǵa deıin), bul jaǵdaıdyń apattyq aýqymyn baıqaýǵa bolady. Qazaqstanda da jaǵdaı máz emes. Elordany halyq arasynda «ushatyn paketter qalasy» dep ataıdy. Qazaqstanda jylyna 5 mln tonnadan astam qatty turmystyq qaldyqtar paıda bolady, onyń keminde 11-15% plastmassa quraıdy. ıAǵnı, árbir qazaqstandyq (jańa týǵan náresteni qosa alǵanda) jylyna shamamen 42 kg plastıkti qoqysqa tastaıdy», - deıdi G. Erejepova.
Spıker barlyq qoǵamdyq uıymdardy, beı-jaı qaramaıtyn azamattardy birlesip jumys isteýge shaqyrdy.
«Bul - tek memlekettiń nemese mınıstrliktiń máselesi emes. Azamattyq qoǵamnyń osy máseleni memlekettik organdarmen birge sheshetin ýaqyty keldi. Plastıkpen lastaný máselelerin durys sheshý joldaryn taýyp, jańa derekter alý úshin bıyl elimizdiń barlyq óńirlerinde plastıkpen lastaný boıynsha zertteý ótkizýdi josparlaımyz. Jumys barysynda, mysaly, statıstıkalyq taldaý, kóshpeli saraptamalar, halyq saýalnamasy, plastıkalyq buıymdardyń óndirisin zertteý, ekonomıkalyq jáne ekologııalyq zertteýler syndy túrli tásilder qoldanylady. Bul elimizde lastaný máselesiniń aýqymyn naqty baǵalaýǵa jáne sheshimin tabýǵa múmkindik beredi», - dedi G. Erejepova.
