Ár qazaqstandyq úshin mańyzdy sát týdy - Serik Erkimbekov

ALMATY. QazAqparat - Qazaqstannyń eńbek sińirgen qaıratkeri, «Qazaqkontsert» memlekettik respýblıkalyq kommýnaldyq kásipornynyń jetekshisi, kompozıtor Serik Erkimbekov kezekten tys Prezıdent saılaýyna qatysty óz pikirin aıtty, dep habarlaıdy QazAqparat tilshisi.

«Prezıdent saılaýy áleýmettik, saıası, tarıhı turǵydan mańyzdy is. Bul bizdiń elimizde bolyp jatqan túrli protsesterdiń tazalyǵyn, demokratııalyq qaǵıdattarǵa saı ekendigin kórsetedi. Qazaqstan konstıtýtsııa men halyqaralyq quqyq sheńberinde ómir súrip keledi. Árbir qazaqstandyq úshin asa mańyzdy sát týdy. Bolashaqtaǵy ómirimiz ózimizdiń tańdaýymyzǵa tikeleı baılanysty», - dedi Serik Erkimbekov.

Onyń aıtýynsha, kez kelgen saılaý demokratııalyq qaǵıdattarǵa saı ótýi kerek.

«Qasym-Jomart Toqaev óz sózinde saılaýdyń ádil ári ashyq ótetinine kepildik bergen bolatyn. Memleket basyna memleket súıgish azamat, ekonomıka, quqyq, mádenıet salasynda bilimi bar. Jan-jaqty azamat kelse dep sanaımyn. Mádenıetsiz eshbir qoǵam damymaıdy», - dedi ol.

Esterińizge sala keteıik, 9 sáýirde Memleket basshysy Qasym-Jomart Toqaev Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyǵyn jarııa etti.

Jarlyqqa sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótetin boldy.

Óz sózinde Qasym-Jomart Toqaev saılaýdyń ashyq, ádil ótetinine ózi kepildik beretinin aıtty.

«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - dedi Qasym-Jomart Toqaev.