Ár qazaqstandyq jylyna 212 danasyn jeıdi: jumyrtqaǵa qatysty statıstıkalyq derekter jarııalandy
ASTANA. KAZINFORM – Bir jylda Qazaqstanda birinshi sanattaǵy jumyrtqanyń baǵasy orta eseppen 13,8%-ǵa artqan. Atalǵan ónim quny ár óńirde ártúrli deńgeıde. Eń qymbaty Almatyda bolsa, al eń arzany Qyzylordada tirkelip otyr. Bul jóninde Kazinform agenttigi Ranking.kz derekterine silteme jasap habarlaıdy.
Respýblıkanyń iri qalalary arasynda birinshi sanattaǵy jumyrtqanyń eń joǵary ortasha baǵasy Almatyda tirkeldi, ıaǵnı on danasy – 689 teńge. Eń tómen baǵa Qyzylordada (464 teńge). Osylaısha, eń joǵary jáne eń tómen baǵa arasyndaǵy aıyrmashylyq – 225 teńge (shamamen 49%).
Sarapshylardyń málimetine júginsek, 22 shildedegi jaǵdaı boıynsha, elde birinshi sanattaǵy on dana jumyrtqanyń ortasha baǵasy 564 teńge bolǵan.
Jumyrtqa quny eń qymbat qalalardyń alǵashqy úshtigine Almatydan soń Taldyqorǵan (663 teńge) men Qonaev (648 teńge) endi. Sonymen qatar, respýblıka boıynsha ortasha baǵadan joǵary kórsetkishter Jezqazǵanda (597 teńge) jáne Astanada (566 teńge) ekeni anyqtaldy.
Kerisinshe, eń qoljetimdi jumyrtqa, joǵaryda jazǵanymyzdaı, Qyzylordada (on danasy – 464 teńge). Tizimde odan keıin Oral (471 teńge), Aqtóbe (484 teńge), Atyraý (488 teńge) jáne Taraz (499 teńge) tur.
Jalpy, ótken jyldan beri birinshi sanattaǵy jumyrtqa baǵasy orta eseppen 13,8%-ǵa joǵarylady. Bul áleýmettik mańyzy bar azyq-túlik taýarlarynyń jalpy baǵa ósiminen 2,5%-ǵa artyq.
Eń joǵary baǵa ósimi Taldyqorǵanda tirkeldi, onda jumyrtqa 27,9%-ǵa qymbattaǵan. Odan keıin Atyraý (23,5%), Semeı (23,4%), Qostanaı (21,7%), Petropavl (21,7%) jáne Óskemen (21,2%) tizimge kirdi.
Ortasha kórsetkishten joǵary ósim baıqalǵan qalalar arasynda Túrkistan (19%), Jezqazǵan (18,9%), Almaty (18,6%), Pavlodar (16,7%), Qonaev (14,6%) jáne Oral (14,2%) bar.
Eń tómen baǵa ósimi Astanada tirkeldi, elordada jumyrtqa nebári 2,9%-ǵa qymbattaǵan. Sondaı-aq, atalǵan kórsetkish myna qalalarda da basqa shaharlarǵa qaraǵanda salystyrmaly túrde baıaý ósken: Shymkentte (4,3%), Qyzylordada (4,8%), Taraz ben Qaraǵandyda (8,1%), Aqtóbede (11,8%), Kókshetaýda (12,4%) jáne Aqtaýda (13,7%).
2025 jyldyń qorytyndysy boıynsha, Qazaqstanda jan basyna shaqqandaǵy jumyrtqa jeý kórsetkishi orta eseppen 212 dana boldy. Bul ótken jylmen salystyrǵanda, 2,9%-ǵa artyq. Atalǵan ónimdi eń kóp Qaraǵandy oblysynyń turǵyndary jeıdi eken (bir adamǵa jylyna 320 danadan keledi). Al eń tómen kórsetkish Mańǵystaý oblysynda baıqaldy. Munaıly ólkede ár kisi jylyna orta eseppen 144 jumyrtqa jeıdi.
Aıta keteıik, buǵan deıin Qazaqstanda táýligine 1 mıllıon jumyrtqany tereń óńdeıtin kásiporyn salynatynyn jazǵanbyz.
