«Ár dúmpýden selk etip otyrdyq»: Taıaý Shyǵystan taǵy 180 qazaqstandyq elge oraldy
ATYRAÝ. KAZINFORM — Búgin tańǵy saǵat 05:00 shamasynda Atyraý qalasyna Saýd Arabııasynyń Jıdda qalasynan 180 jolaýshy mingen ushaq qondy. Keıin olar Almaty qalasyna ushyp ketti.
Elge oralǵan azamattardyń aıtýynsha, olar Dohadan Er-Rııad qalasyna deıin avtobýspen shamamen 13 saǵat, keıin Er-Rııadtan Jıddaǵa 10 saǵattan astam ýaqyt júrip, jetken. Jol boıynda qaýipsizdik máselesi únemi baqylaýda bolyp, jolaýshylardy Qazaqstannyń sheteldegi dıplomatııalyq ókildikteri súıemeldegen.
Jolaýshylardyń biri Gúlnur Botaqanovanyń aıtýynsha, qıyn jaǵdaıda Qazaqstan Úkimeti men elshilik tarapynan kórsetilgen qoldaý aıryqsha sezilgen.
— Biz Úkimetke de, Qazaqstan elshiligine de alǵys aıtamyz. Óıtkeni bizdi Dohadan bastap Saýd Arabııasyna deıin birge alyp júrdi. Ol jaqta da Qazaqstannyń Saýd Arabııasyndaǵy elshiligi qarsy aldy. Alty avtobýs kolonnamen júrdik, únemi baqylaýda boldyq. Sondyqtan qoldaýdy qatty sezindik. Al ol jaqtaǵy jaǵdaıǵa kelsek, qonaqúıde otyrǵan kezde syrttan gúrsildegen dybystar estilip, jarqyldardy kórgende, telefonǵa dabyl kelgende qorqynyshty bolady. Sondaı bir tyǵyryqqa tirelgendeı kúıdi sezinesiń, — dedi ol.
Al jolaýshylardyń taǵy biri Gúlzıpa Begimbaeva Qatarǵa demalýǵa barǵanyn aıtady.
— Qatarǵa demalýǵa barǵan edik. Osyndaı jaǵdaıda aman-esen elge jetip otyrmyz. Qazaqstannyń azamattaryna raqmet. Qatty qoryqtyq, ár dúmpýden selk etip otyrdyq. Elge qalaı jetemiz dep alańdadyq. Biz bir kúnnen keıin ushýymyz kerek edi. 28-i kúni tústen keıin dúmpý bastaldy. Sodan keıin qonaqúıde boldyq. Erteńine elshilikterge habar berilip, olar kelip bizdi basqa jerge ornalastyrdy. Eki kún sol jerde boldyq. Keıin Saýd Arabııasyna avtobýspen keldik, — deıdi ol.
Jolaýshylardyń basym bóligi Qatar eline demalýǵa barǵan. Elge oralǵandardyń arasynda sol jaqta bilim alyp júrgen stýdentter de bar. Olardyń aıtýynsha, oqý protsesi ýaqytsha qashyqtan oqytý formatyna aýystyrylǵan.
— Kelesi aptadan bastap Qazaqstannan oqımyz. Qatardaǵy jáne Saýd Arabııasyndaǵy Qazaqstan elshilikteri barynsha qoldaý kórsetti, — dedi stýdent Oljasbek Jakenov.
Eske salaıyq, 3 naýryzdan 4 naýryzǵa qaraǵan túni Saýd Arabııasynyń Medına jáne Jıdda qalalarynan Atyraýǵa 500-ge jýyq jolaýshy jetkizildi. Atap aıtqanda, Medına — Atyraý baǵyty boıynsha alǵashqy ushaqta 145 adam bolsa, Jıddadan kelgen eki reıspen 353 azamat elge oralǵan. Keıin olar Almaty jáne Astana qalalaryna ushyp ketken edi.
Buǵan deıin 34 qazaqstandyq Irannan Armenııaǵa evakýatsııalanǵanyn jazǵan edik.