Ár balamyzdy qabiletine qaraı damytamyz- Qarsaqovtar otbasy
Qaztalov aýdany ortalyǵynda turatyn Qarsaqovtar otbasy yntymaǵymen erekshelenedi.
Otaǵasy Medet Baqytjanuly Alma Orazbaeva atyndaǵy orta mektepte birinshi sanatty dene shynyqtyrý pániniń muǵalimi bolyp qyzmet etedi. Jary Gúlaıym Tólegenqyzy Qaztalov orta mektebinde bastaýysh synyptarda sabaq beredi, joǵary sanatty ustaz.
«Qolymyzda anamyz Orynǵanym men ákemiz Baqytjan birge turady. Biz - ata-anasyn ardaqtaǵan, bes bala tárbıelep otyrǵan, eń bastysy, tatýlyǵy jarasqan otbasymyz. Ony el bilip, syılaıdy. Ata-anamyz jarymyz ekeýmizdiń alańsyz eńbek etip, bıikterden kórinýge qalaı qoldaý kórsetse, biz de ár balamyzdyń qabilet-qarymyn baıqap, olardyń rýhanı damýyna solaı kómektesemiz. Balalarymyz tabystarǵa jetip jatsa, bári - osy sabaqtastyqtyń arqasy», deıdi Medet.
Shyndyǵynda da balalarynyń qaı-qaısysy da ónerli. Tuńǵysh qyzdary Nazym qolyna qalam alyp, óleń shyǵarady, rólderdi aınytpaı somdaıtyn qabileti bar. Ol «Jas sahna» respýblıkalyq baıqaýynan bas júldeni jeńip aldy. Poezııany jany súıedi. Súıikti aqyn-jazýshylary - Aqushtap Baqtygereeva, Muqaǵalı Maqataev, Sherhan Murtaza, Farıza Ońǵarsynova. Dáriger bolýdy armandaǵanmen, aqyndyq pen akterlikti qosymsha alyp júremin dep oılaıdy.
Jýyrda aqyn, Memlekettik syılyqtyń laýreaty Aqushtap Baqtygereevanyń Qaztalov aýylynda ótken shyǵarmashylyq keshinde osy Nazym jalyndy jyrlaryn oqyp, kózge tústi. Súıikti aqyny onyń talabyn quptap, talantyn jetildire berýine tilektestigin bildirdi.
Qarsaqovtardyń úlken uly Sultan mýzyka mektebin baıan aspaby boıynsha úzdik baǵamen támamdady. Ol - baıan aspabynda oryndaýdan oblystyq, respýblıkalyq jáne halyqaralyq baıqaýlardyń san márte jeńimpazy.
Taǵy bir qyzdary Aqnur - «Qarlyǵash» halyqtyq bı ansambliniń múshesi, óz tobymen halyqaralyq baıqaýda birinshi oryn alyp úlgerdi.
Uldary Nurdáýlet boks úıirmesine qatysady, oblystyq jarystyń ekinshi oryn ıegeri. Kenjeleri Erkenaz kishkentaı, on aılyq qana.
Sportpen turaqty aınalysatyn Medet - sambo, tennıs, shańǵydan oblystyq jarystardyń júldegeri. Qurylysqa da ıkemi bar, úıdi qaıta óńdegendi, jaz ýaqytynda qurylys salǵandy unatady.
Gúlaıym - aýdandyq, oblystyq deńgeıdegi kásibı baıqaýlardyń jeńimpazy. Voleıbol oınaǵandy unatady. Óz janynan óleń shyǵaratyn, túrli keshterdi júrgizetin óneri bar.
«Men balany dúnıege ákelgen soń ár ata-ana barlyq jaǵdaıyn jasaýy kerek dep oılaımyn. Árıne, memleket tarapynan kórsetilip jatqan qoldaýǵa oń qaraımyn. Biraq shama kelgenshe qajet etpeýge tyrysamyn. Óz eńbegimizdiń jemisin kórgenge ne jetsin. Aldaǵy maqsatymyz - qyrkúıek aıynda ótetin «Mereıli otbasy» ulttyq baıqaýyna jan-jaqty daıyndalyp, óńir namysyn abyroımen qorǵaý, senim údesinen shyǵý úshin barymyzdy salamyz», - dedi QazAqparat tilshisine Medet Qarsaqov. 
