Ár balaǵa 42 500 teńge járdemaqy berile me – Asqar Nııazov jaýaby

NUR-SULTAN. QazAqparat – QR Eńbek jáne halyqty áleýmettik qorǵaý mınıstrligi Áleýmettik kómek saıasatyn damytý departamentiniń dırektory Asqar Nııazov ataýly áleýmettik kómek mólsheri qalaı esepteletindigin túsindirdi, dep habarlaıdy QazAqparat tilshisi.

«Ár balaǵa 42 500 teńgeden járdemaqy tóleý máselesin jan-jaqty qarastyrdyq, zerdeledik. 42 500 teńgeden, 20 myń teńgeden járdemaqy qarastyrýdy usynǵandar da boldy. Biraq, ortaq ymyraǵa kele otyryp, kópbalaly otbasylardyń ár balasyna 4 AEK mólsherinde, ıaǵnı 11 668 teńgeden járdemaqy tóleý sheshimi qabyldandy jáne qazirgi ýaqytta berilip jatyr. Elimizde 18 jasqa tolmaǵan 6,2 mln bala bar. Eger 42 500 teńgeni 6,2 mln-ǵa kóbeıtsek, aı saıyn 263 mlrd teńge, jylyna 3,2 trln teńge shyǵady. Al Eńbek mınıstrliginiń halyqqa kórsetetin áleýmettik qoldaý is-sharalaryna jumsaıtyn qarajaty 3,9 trln teńgeni quraıdy. Bul respýblıkalyq bıýdjettiń 24 paıyzyna teń. Endi oǵan 3,2 trln teńge qosatyn bolsaq, onda bul elimizdiń densaýlyq saqtaý, bilim, qorǵanys, turǵyn úı jáne basqa da mańyzdy salalarǵa jumsalatyn qarajatynyń shektelýine ákep soǵýy múmkin», - dedi ol Ortalyq kommýnıkatsııalar qyzmetindegi brıfıng barysynda BAQ ókilderiniń saýalyna oraı.

Departament basshysynyń atap ótýinshe, Eńbek mınıstrligi joǵaryda atalǵan jaıttardy eskere kele, ár balaǵa aı saıyn 42 500 teńgeden járdemaqy tóleý usynysyn qoldaǵan joq.