Ár balaǵa - 21 myń teńge: Ótinishter qaı kezde jáne qalaı qabyldanady
«Biz keshe ǵana selektor (beınebaılanys arqyly ótkiziletin otyrys - avt.) ótkizdik. Mınıstrdiń tapsyrysy bar. Qazir ákimdik, «Azamattarǵa arnalǵan úkimet» memlekettik korporatsııa, sosyn bizdiń jergilikti departamentterimiz jáne jumyspen qamtý ortalyqtary bar ǵoı. Olardyń bári ótinishterdi qabyldaıdy», - dedi S.Jaqypova QazAqparat tilshisine bergen suhbatynda.
Onyń aıtýynsha, 1 sáýirden bastap ótinish berýdiń qajeti joq. Sebebi aldymen zań kúshine enýi kerek. Sonyń negizinde mınıstrdiń birneshe buıryǵyna qol qoıylady. Sóıtip, atalǵan qujattar jergilikti atqarýshy organdarǵa túskennen keıin ótinishter qabyldana bastaıdy. Biraq ataýly áleýmettik kómektiń bári 1 sáýirden bastap esepteledi. «Men ózim birneshe ret aıttym, halyqqa 1-nen bastap ótinish berińizder dep aıtýǵa bolmaıdy. Sebebi zań endi ǵana qabyldanady. Atalǵan qujat 28 naýryzda Senattyń keńeıtilgen otyrysyna shyǵarylady. Odan keıin Senat maquladap qoldasa, Elbasynyń qol qoıýyna jiberiledi. Al qazirgi zańǵa sáıkes, ataýly áleýmettik kómek ótinishti bergen kúnnen emes, bergen aıdan bastap taǵaıyndalady. Demek, azamattar 15 sáýirde kele me, 29 sáýirde kele me, báribir ataýly áleýmettik kómek olarǵa 1 sáýirden bastap taǵaıyndalady. Osy norma saqtala beredi», - dep atap kórsetti S.Jaqypova.
Vıtse-mınıstrdiń sózine qaraǵanda, búginde mınıstrdiń arnaıy buıryqtary daıyn tur. Zań qabyldansa, atalǵan qujattar birden QR Ádilet mınıstrliginiń tirkeýinen ótedi. Sóıtip, barlyq jergilikti atqarýshy organdarǵa taratylady. Sonyń negizinde ótinishter qabyldanady. «Sondyqtan 1 sáýirden baryp, ótinishti qabyldaýdy talap etse de, jergilikti atqarýshy organdar ony qabyldaı almaıdy. Olardyń barlyǵy buıryqty kútedi. Elbasy zańǵa qol qoıdy ma, ertesinde birden buıryq tirkeýden ótýi kerek. Biz bárin daıyndap qoıdyq. Jergilikti atqarýshy organdar da birden habaryn beredi», - deıdi S.Jaqypova.
Aıta keteıik, Nur Otan partııasynyń XVIII sezinde QR Tuńǵysh Prezıdenti - Elbasy Nursultan Nazarbaev kópbalaly otbasylarda árbir balanyń tólemaqysyn 21 myń teńgege deıin arttyrýdy tapsyrdy.
«Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeıtýdi tapsyramyn. Atalǵan kórsetkishti kúnkóris deńgeıiniń 70 paıyzyna deıin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deıin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondaı otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áıtpese, sonyń bárin sanaǵanda kópbalaly otbasylar jaǵdaı jaqsy azamattar bolyp shyǵa keledi», - dedi N.Nazarbaev. Osydan keıin Elbasy atalǵan sharalardy 1 sáýirden bastaýdy mindettedi.
QR Eńbek jáne xalyqty áleýmettik qorǵaý mınıstri Berdibek Saparbaev balalarǵa beriletin 21 myń teńgeden bólek ata-anasyna da qosymsha aqy tólenetinin jetkizdi. Búginde elimizde kúnkóristiń mınımýmy 29 698 teńgeni quraıdy. Osy ýaqytqa deıin ataýly kómekti bir adamǵa shaqqanda kúnkóris deńgeıiniń 50 paıyzynan, ıaǵnı 14 849 teńgeden aspaıtyn otbasylar alsa, endi Prezıdenttiń tapsyrmasy boıynsha atalǵan kórsetkish 70 paıyzynan - 20 789 teńgege deıin kóterilip otyr. Demek, kópbalaly otbasynyń jalpy tabysyn árbir adamǵa bólgende aqshanyń somasy kúnkóris deńgeıiniń 70 paıyzǵa, ıaǵnı 20 789 teńgege jetpese, árbir balaǵa 21 myń teńgeniń járdemaqysy beriledi.
«Sosyn eger januıanyń árbir adamyna shaqqanda tabys kúnkóris deńgeıinen (70 paıyzdan- avt.) tómen bolsa, aıyrmashylyq 10 myń teńge bola ma, 7 myń teńge bola ma, sol ata-anasyna da qosymsha tólenedi. Odan keıingi eń úlken jeńildik, buryn tabysty eseptegende «Altyn alqa», «Kúmis alqa», kóp balaǵa beriletin járdemaqy, múgedekterdiń járdemaqysy men stıpendııasy sanalatyn. Endi, sonyń bárin esepke almaıdy», - deıdi B.Saparbaev.
Buǵan deıin QazAqparat tilshisi atalǵan járdemaqyny taǵaıyndaýdyń tártibinsaraptap shyqqan bolatyn.
