Ár balaǵa - 21 myń teńge: Eńbek mınıstri járdemaqyǵa ótinish tapsyryp jatqandarmen kezdesti
Aıta keteıik, bıylǵy jyldyń 1 sáýirinen bastap Ataýly áleýmettik kómektiń jańartylǵan formatyna, ıaǵnı respýblıka boıynsha 21 myń teńgelik járdemaqyny taǵaıyndaýǵa ótinishter qabyldanýda. Ataýly áleýmettik kómektiń bul túri turmysy tómen barlyq otbasylarǵa beriledi.
Mamandardyń aıtýynsha, atalǵan ortalyqqa tańerteńnen beri 500-den astam adam keldi. Qyzmetkerler búgin keshke deıin kelgen barlyq adamdardy qabyldaıtyn bolady.
Óz kezeginde B. Saparbaev járdemaqyǵa ótinishterdi qabyldaýdyń alǵashqy kúnderi turǵyndardyń kóptep kelýine baılanysty ortalyqqa kezekshi dárigerdi shaqyrtý kerektigin atap ótti. Sonymen qatar mınıstr áleýmettik qoldaý máselelerine baılanysty jınalǵan adamdardyń saýaldaryna da jaýap berdi.
«Sizder asyqpańyzdar, eger de búgin ýaqyttaryńyz tyǵyz bolsa, osynda erteń nemese aptanyń basqa kúnderi de kele alasyzdar. Budan buryn habarlanǵandaı, osy aıdyń aıaǵyna deıin sizderden ótinishterdi qabyldaımyz. Óıtkeni sáýir aıynyń sońynda tapsyrsańyz da, tólem 1 sáýirden bastap esepteledi», - dedi Berdibek Saparbaev.
Budan keıin mınıstr Abaı dańǵylyndaǵy halyqqa qyzmet kórsetý ortalyǵyna jáne Almaty aýdany ákimdigine baryp, AÁK boıynsha keńes berý sharalarymen tanysty.
Osy oraıda vedomstvo basshysy qosymsha qujattardy surastyrý arqyly adamdardy áýrege salý jaǵdaılaryna jol bermeý kerektigin tapsyrdy. Berdibek Saparbaev bul másele erekshe baqylaýda bolýy kerektigin atap ótti.
Aıta keteıik, jańa mehanızm boıynsha eń tómengi kúnkóris deńgeıiniń 70% nemese 20 789 teńge mólsherindegi kepildi tólem 18 jasqa deıingi balalarǵa, al orta, tehnıkalyq jáne kásiptik, orta bilimnen keıingi, joǵary jáne joǵary oqý ornynan keıingi bilim berý uıymdarynda kúndizgi oqý nysany boıynsha oqyǵan jaǵdaıda, bilim berý uıymyn bitiretin ýaqytqa deıin (biraq 23 jasqa tolǵanǵa deıin) tólenetin bolady.
