Ár bala qaýipsiz bolýy kerek: Elde qorǵaý júıesi jetildirilmek
ASTANA. KAZINFORM — Oqý-aǵartý mınıstri BUU Bas hatshysynyń arnaıy ókilimen kezdesti.
Memleket basshysy Qasym-Jomart Toqaevtyń bastamasymen Qazaqstanda balalardyń quqyqtaryn qorǵaýǵa, zorlyq-zombylyqtyń aldyn alýǵa jáne árbir balanyń qaýipsizdigin qamtamasyz etýge baǵyttalǵan zańnamalyq jáne ınstıtýtsıonaldyq reformalar júzege asyrylyp jatyr.
Osy máseleler Oqý-aǵartý mınıstri Juldyz Súleımenovanyń Qazaqstanǵa jumys saparymen kelgen BUU Bas hatshysynyń balalarǵa qatysty zorlyq-zombylyq máseleleri jónindegi arnaıy ókili Nadjat Maalla Mdjıdpen kezdesýiniń negizgi taqyryby boldy.
Kezdesýge Qazaqstan Respýblıkasy Quryltaıy tóraǵasynyń orynbasary, Bala quqyqtary jónindegi ýákil Dınara Zakıeva, BUU Balalar qorynyń (ıÝNISEF) jáne Oqý-aǵartý mınıstrliginiń qyzmetkerleri de qatysty.
Juldyz Súleımenova balalardyń quqyqtaryn qorǵaýdyń ulttyq júıesindegi negizgi ózgeristerdi, sondaı-aq 2026–2030 jyldarǵa arnalǵan «Qazaqstan balalary» tujyrymdamasynyń basty baǵyttaryn tanystyrdy.
— Balalardy qorǵaý ınfraqurylymyn damytýǵa erekshe kóńil bólindi. Óńirlik bala quqyqtaryn qorǵaý basqarmalaryn qurý, qorǵanshylyq jáne qamqorshylyq organdary men psıhologııalyq qoldaý ortalyqtarynyń jumysyn jetildirý, kómekke muqtaj balalardy erte anyqtaý jáne beıindi qyzmetterdiń ózara is-qımyly talqylandy, — delingen habarlamada.
Sondaı-aq zorlyq-zombylyq pen býllıngtiń aldyn alý, bilim berý uıymdaryndaǵy psıhologııalyq qaýipsizdikti nyǵaıtý jáne balalardyń, onyń ishinde «111» baılanys ortalyǵy arqyly kómekke júginý múmkindikterin keńeıtý sharalary qarastyryldy.
Osyǵan deıin Qazaqstan bala quqyǵy jóninen álemdik reıtıngte úzdik 25 eldiń qataryna engenin jazǵanbyz.
