Ár bala dara – Qazaqstan juldyzdary erekshe kútimdegi balalarmen fotosessııa jasady
Elordanyń Mega Silkway saýda ortalyǵynda otandyq juldyzdar men erekshe kútimdegi balalar qatysqan «Jyly júrekpen...» fotokórmesi ashyldy, dep habarlaıdy Kazinform.
«Jyly júrekpen...» fotokórmesin QR Prezıdenti Teleradıokesheni men «Dara» prezıdenttik bastamalar qory uıymdastyrǵan. Qazaqstannyń medıa jáne mádenıet salasyndaǵy tanymal tulǵalary osy fototúsirilim arqyly ınklıýzıvti qoǵamnyń mańyzyn, erekshe kútimdegi balalardyń teńdigin, qoǵamdaǵy quqyǵy men múmkindikteriniń mańyzyn kórsetkisi kelgen.
«Rasynda da qoǵamda ońaltý ortalyqtaryn, beıimdeý sporttaryn jáne jalpy ınklıýzııany damytý boıynsha belsendi jumys júrgizilip jatyr. Ókinishke oraı, azamattarymyzdyń tolerantty bolýyna jáne adamdardyń teń múmkindikter alýyna óte az kóńil bólinedi. Tanymal tulǵalardy fototúsirilimge shaqyrý arqyly erekshe fızıkalyq jáne bilim qajettilikteri bar túrli jastaǵy adamdardyń ózgelermen teń quqyqta ekenine nazar aýdartqymyz keldi. Saýda, oıyn-saýyq ortalyǵy, áýejaı syndy halyq kóp jınalatyn oryndarda jáne óńirlerde bul fotokórmeni jalǵastyramyz», – dedi «Dara» prezıdenttik bastamalar qorynyń jetekshisi Ásel Shildebaeva saýda, oıyn-saýyq ortalyǵyndaǵy fotokórmeniń ashylýynda.
Ideıaǵa Qydyráli men Qaraqat, Marjan Arapbaeva, Qanat jáne Sveta Aıtbaevtar, Dosymjan Tańatarov, Láılá Sultanqyzy, Dınara Sátjan, Qurmash Mahanov, Bala quqyqtary jónindegi ýákil Dınara Zákıeva syndy tanymal tulǵalar qoldaý kórsetti. Sýretterdi belgili fotograf, «Úrker» syılyǵynyń ıegeri Ospan Álı túsirgen.
«Osy jobany oılastyrǵanymyzǵa, josparlaǵanymyzǵa 2-3 jyl bolǵan edi. Qazaqstannyń juldyzdarymen qalaı sóılesemiz, qalaı jol tabamyz, dep biraz alańdadyq. Osy kezde Prezıdent Teleradıokesheni men «Dara» uıymy bizdi qoldap, armanymyzdy iske asyrýǵa kómektesti. Otandyq juldyzdarǵa úlken alǵys aıtqym keledi, túsirilim 3-4 saǵatqa sozylsa da, olar balalarymyzdyń kóńilin aýlap, til tabysyp, balalardyń kóńilin kóterip, keremet ýaqyt ótkizdi. Bul kún balalarymyz úshin úlken mereke boldy», –deıdi №96 mektep-gımnazııanyń dırektory Sáýle Temenova.
Astananyń sol jaǵalaýyndaǵy bul mekteptiń ashylǵanyna 1,5 aı ǵana ýaqyt ótken, osy aralyqta bilim alý úshin 1500 bala jınalǵan. Onyń ishinde erekshe bilim alatyn 18 bala bar. Olarǵa barlyq qajetti qural-jabdyqtar ázirlengen, defektolog, logoped, sýrdopedagog jáne ergoterapevt syndy arnaıy mamandar jumys isteıdi. Sondaı-aq balalar mektepten keıin aınalysatyn naqty kásipti de úırenedi, ásirese aspazdyq, fotografııa, polıgrafııa sekildi suranysqa ıe baǵyttar oqytylady.
«Fotosessııaǵa balasyn jibergisi kelmegen ata-analar da boldy. Degenmen, biz balalardy qoǵamnan jasyryp otyrmaýymyz kerek. Kerisinshe, jaryqqa shyǵarýymyz qajet. Mektepten keıin de balalardyń ómiri jalǵasyp, qoǵamda teń quqyqta ómir súrýi tıis. Bizge materıaldyq kómek múldem qajet emes, memleket bizdiń bar jaǵdaıymyzdy jasap qoıǵan. Bar bolǵany qoǵamnyń durys kózqarasy men jyly qarym-qatynasy kerek», – deıdi mektep dırektory.
Aldaǵy ýaqytta «Dara» prezıdenttik bastamalar qory bul mekteppen birlesip, ózge de qaıyrymdylyq jobalaryn júzege asyrýǵa nıetti.
«Meniń qyzym Dıana 3-synypta oqıdy jáne fototúsirilimge qatysqanyna dán rıza. Mundaı kórmeler ınklıýzıvti qoǵamnyń damýy úshin óte qajet. Búgin de qyzymnyń synyptastary kelip, Dıanany juldyz dep maqtap ketti. Medıatulǵalar bizdiń balalarmen sóılesip, olardyń qarapaıym bala ekenin, tek olarǵa kóbirek kóńil bólý keregin, qorqynyshty eshteńe joǵyn kórsetti. Eýropada mundaı balalardy esh bólip-jarmaıdy, al bizde dıagnoz qoıylǵan balalardy keı balabaqshalar men mektepter qabyldamaıdy. Balalardy oqytýǵa bolady, tek arnaıy tásil qajet. Biz búgingi kórmege qýana qatystyq. Fotograf pen tanymal tulǵalardyń meıiriminiń arqasynda balamyz ashyla tústi jáne fotosessııaǵa asa qyzyǵýshylyqpen qatysty. Qazir de ózderin sýretten kórip, máz bolyp júr», – deıdi Dıananyń anasy Ásııa Naıdarova.
