Ár azamattyń úlesi Qazaqstannyń halyqaralyq bedelin qalyptastyrady — depýtat
ASTANA. KAZINFORM — «Taza Qazaqstan» bastamasy bir rettik aktsııalar aıasynda qalmaı, qoǵamdaǵy uzaq merzimdi ekologııalyq mádenıettiń negizine aınalýy kerek.
Bul týraly Kazinform tilshisine Quryltaı depýtaty Sergeı Ponomarev pen «Human Health Institute» qoǵamdyq uıymynyń basqarma tóraǵasy Aıdar Kapasov aıtty.
Sergeı Ponomarevtiń pikirinshe, Memleket basshysynyń jýyrda volonterlermen kezdesýde aıtqan negizgi oıy — «Taza Qazaqstandy» uzaq merzimdi ekologııalyq mádenıet pen qoǵamdyq sanany qalyptastyratyn negizge aınaldyrý.
— Tazalyq pen tártip — turmystyq mádenıet pen patrıotızmniń tikeleı kórsetkishi. Búginde eń ózekti mindet — qoǵamdy nemquraılylyqtan jáne qoǵamdyq oryndardy «eshkimniń menshigi emes» dep qabyldaý ádetinen aryltyp, ár adamnyń óz qalasyna degen jeke jaýapkershiligin qalyptastyrý, — dedi depýtat.
Ol azamattardyń ekologııalyq sharalarǵa keńinen tartylǵanyna da nazar aýdardy.
Depýtattyń aıtýynsha, jyl basynan beri ekologııalyq is-sharalarǵa shamamen 7 mln qazaqstandyq qatysyp, 130 myń gektardan astam aýmaq tazartylǵan. Sondaı-aq 1,3 mln aǵash otyrǵyzylǵan. Bastama qolǵa alynǵaly beri jalpy 3,8 mln tonna qaldyq jınalǵan.
— Halyqtyń úshten biriniń bul iske atsalysýy ekologııalyq kún tártibiniń jekelegen senbilikter aıasynan shyǵyp, turaqty áleýmettik normaǵa ári qoǵamdy biriktiretin ortaq iske aınalyp kele jatqanyn kórsetedi, — dep esepteıdi depýtat.
Sonymen qatar, onyń sózinshe, turaqty ekologııalyq mádenıet qalyptastyrý úshin keshendi tásil qajet. Bul rette ekologııalyq aǵartý jumystaryn kúsheıtý, qoljetimdi ınfraqurylym qalyptastyrý jáne mádenıetsizdikke «nóldik tózimdilik» qaǵıdaty negizinde quqyqtyq tártipti qatań saqtaý mańyzdy.
— Zań talaby barshaǵa birdeı bolyp, tazalyq júıeli túrde saqtalsa, tártip kúndelikti ómirdiń tabıǵı normasyna aınalady, — dep atap ótti Ponomarev.
Depýtat jastardy ekologııalyq jáne qoǵamdyq bastamalarǵa tartýdyń mańyzyn da aıtty. Onyń pikirinshe, aýmaqtardy abattandyrýǵa jáne aǵash otyrǵyzýǵa qatysý jastardyń qoǵamdyq múlikke ári ózge adamdardyń eńbeginiń nátıjesine uqypty qaraýyna yqpal etedi.
— Uqyptylyq pen tártip — zamanaýı ári ozyq adamnyń qasıeti ekenin túsindirý mańyzdy. Ár adamnyń qosqan úlesi Qazaqstannyń halyqaralyq bedelin qalyptastyrady, — dedi ol.
Qoǵam belsendisi Aıdar Kapasov ta ekologııalyq kún tártibin tek aýmaqtardy tazalaý men kógaldandyrý máselelerimen shektemeý kerektigin atap ótti.
— Búginde Qazaqstan úshin aýanyń lastanýy, sý men topyraqtyń sapasy, qaldyqtardy basqarý, sondaı-aq hımııalyq qaýipsizdik máseleleri ózekti. Ekologııalyq problemalardy, eń aldymen, olardyń adam densaýlyǵy men halyqtyń ómir sapasyna áseri turǵysynan qarastyrý qajet, — dep esepteıdi ol.
Aıdar Qapasov ekologııalyq kún tártibiniń búginde halyqqa jaqyndaı túskenin de atap ótti.
— Qazir azamattardyń, jastardyń, qoǵamdyq uıymdar men bıznestiń ekologııalyq is-sharalarǵa belsendi qatysyp jatqanyn kórip otyrmyz. Eń mańyzdysy qorshaǵan ortanyń tazalyǵy men jaı-kúıi tek memlekettiń emes, árqaısymyzdyń jaýapkershiligimiz ekeni týraly túsinik birtindep qalyptasyp keledi, — dedi Aıdar Kapasov.
Onyń aıtýynsha, ekologııalyq mádenıetti qalyptastyrýdy erte jastan bastaý qajet. Sonymen birge azamattardyń qorshaǵan ortaǵa jaýapkershilikpen qaraýyna naqty jaǵdaı jasalýy kerek. Atap aıtqanda, qaldyqtardy bólek jınaýǵa arnalǵan qoljetimdi ınfraqurylym men túsinikti erejeler bolýy mańyzdy.
Eske salaıyq, 19 qyrkúıekte Memleket basshysy «Taza Qazaqstan» aktsııasyna qatysyp, Astanadaǵy Prezıdent saıabaǵynda aǵash otyrǵyzǵan edi.
