Ár azamat referendýmda daýysqa salynatyn máselelerdi oqyp shyǵýy kerek - jýrnalıst

NUR-SULTAN. QazAqparat – Halyqty referendýmǵa shaqyra bergenshe, onda daýysqa salynatyn máselelermen tanysýǵa shaqyrý mańyzdy. «Pavlodar geografııa úıi» qoǵamdyq birlestiginiń dırektory, Jýrnalıster odaǵynyń oblystyq qoǵamdyq keńesiniń tóraǵasy Aleksandr Vervekın Qazaqstannyń Azamattyq alıansy ótkizgen telekópirde osyndaı paıym aıtty, dep habarlaıdy QazAqparat tilshisi.

«27 jyl buryn referendým ótip jatqanda men mektepke baryp júr edim. Memleket basshysy bastamashy bolyp otyrǵan ózgeristerge daıyndyq qyzý júrip jatyr dep aıtýǵa bolady. Bul reformany tarıhı oqıǵa dep ataıtynymyz, ár qaraı sondaǵy normalar boıynsha ómir súremiz. Ózgertilgen Konstıtýtsııanyń ómirsheńdigi, ondaǵy talaptar men erejelerdiń oryndalýy bizge baılanysty. Bul referendýmǵa qatyssaq ta, qatyspasaq ta erteńgi ómirimizdiń sapasyna daýys beremiz. Óıtkeni Konstıtýtsııa elimizdegi eń joǵary turǵan zań bolyp esepteledi», - degen qoǵamdyq uıym basshysy qazir elimizde zańnyń oryndalý deńgeıi mardymsyz ekenin atap ótti.

«Ókinishke qaraı, Ata zańymyz da, ózge zańdar da elimizde tolyq oryndalmaıdy. Jalpy búginge deıin qabyldanǵan zańdardyń kóbi jaqsy jazylǵanymen, aıqyn ári naqty tápsirlengenimen, jumys isteý jaǵy aqsap jatyr.

Sonda referendýmda daýys berýge qatysamyz ba, qalaı daýys beremiz degen máseleden bólek, ol Konstıtýtsııanyń qabyldanýyn qalaı qadaǵalaımyz degen másele ózektirek. Konstıtýtsııada ózgerissiz qalatyn jáne ózgerlitetin postýlattardy qalaı iske asyramyz degen másele bar», - dedi Aleksandr Vervekın.

Onyń sózine qaraǵanda, pavlodarlyqtardyń referendýmǵa degen qyzyǵýshylyǵy joǵary jáne ony saılaýlardyń aldyndaǵy qyzvǵýshylyq deńgeıimen salystyrýǵa kelmeıdi. Óıtkeni halyqtyń saılaýǵa degen qyzyǵýshylyǵy mundaı bolyp kórmegen eken.

«BAQ arqyly, áleýmettik jeli arqyly kópshilik arasynda talqylanyp jatqan máseleler bar. Ashanadan bastap avtobýstyń ishinde de bul máseleler talqylanyp jatyr. Mysaly, Memleket basshysy men onyń otbasy múshelerine qatysty ózgertýler eldiń nazarynda. Jer qoınaýyndaǵy baılyqtyń taǵdyry da eldi alańdatyp otyr. Ony halyqqa ortaq ıgilik dep belgilengenmen, sol halyqtyń atynan memleket menshik ıesi retinde sheshim qabyldaı alady degen joba usynylyp júr. Bul bizdiń qoǵam úshin óte mańyzdy másele. Ony jer reformasy kezinde bárimiz kórdik.

Qazir árbir qazaqstandyq Konstıtýtsııaǵa usynylyp otyrǵan ózgeristiń árqaısysyn jete zerttemese de, jobany tolyq oqyp shyǵýy kerek. Halyqqa osyny aıtýymyz qajet. Referendýmǵa baryńyzdar dep úgittegennen osy paıdalyraq», - dedi qoǵam belsendisi.

Resmı málimet boıynsha, bıyl jer qoınaýyn paıdalanýshylarmen jasalǵan 52 kelisimshart kúshin joıǵan.