Ár aýyldyń, ár aýdannyń óziniń shaǵyn bıýdjeti bolady - Elbasy
ASTANA. 29 jeltoqsan. QazAqparat - Ár aýyldyń, ár aýdannyń óziniń shaǵyn bıýdjeti bolady.
Bul týraly Elbasy Nursultan Nazarbaev qazaqstandyq telearnalarǵa bergen suhbatynda málim etti.
Jergilikti ózin ózi basqarý júıesi men aýyl ákimderin saılaý naýqany jaıynda qoıylǵan saýalǵa jaýap qaıyrǵan QR Prezıdenti N.Nazarbaev jergilikti máselelerdi halyqtyń ózi qatysyp sheshýi kerektigine toqtaldy.
«Jergilikti ózin ózi basqarý júıesi óte mańyzdy. Ár el óz múmkindigine saı sheshedi, degenmen eshbir memleket osy máseleni tolyq sheshken joq. Meniń oıymsha, jergilikti máselelerdi halyqtyń ózi qatysyp sheshýi kerek. Ol úshin ákimniń quqyǵy bolý kerek, ákimniń taǵaıyndalýyna halyqtyń qatysýy bolýǵa tıis. Al ákim halyq aldynda esep berýi kerek», - dedi Elbasy.
«Mysaly, aýdannyń halqy aýdandyq máslıhatty saılaıdy, al máslıhat depýtattary kelisip ákimdi saılaıdy. Biz tájirıbe alamyz dep ákimderdi tikeleı saılaýǵa kóship edik. Biraz qıynshylyqtar boldy, árqaısysy ózine tartyp, birlik tanyta alǵan joq. Sol sebepten endi aýdandyq máslıhattar ákimderdi saılaıtyn bolsa, bıznesten túsetin qarajatty jergilikti organdarda qaldyrsaq, ony máslıhattyń komıssııasy qarap otyratyn bolsa, ákimder aýyldardyń óz máselelerin - kópir, monsha salý, mektep jóndeý, múgedekterge kómek kórsetý jáne taǵy basqa máselelerdi elmen birge sheshetin bolsa - sonda halyqtyń ózi sol jumysqa kirisip otyrady», - dedi QR Prezıdenti.
«Ózin ózi basqarý máselesi munymen toqtalmaıdy. Ári qaraı ár aýyldyń, ár aýdannyń óziniń shaǵyn bıýdjeti bolady. Sonda ǵana máselelerdi sheshý úshin múmkindikteri bolady. Bul jumysty tıimdi ótkizip, bolashaqta aýdan, oblys ákimderin jalpylama saılaý arqyly taǵaıyndaýǵa bolatyn shyǵar. Biraq biz buǵan asyqpaýymyz qajet», - dep túıdi sózin Memleket Basshysy.
