Ár aýdan ózin-ózi qamtamasyz ete alatyndaı jaǵdaıǵa jetýi tıis - Ómirzaq Shókeev
Ordabasy aýdanynyń ákimi Álipbek Óserbaevtyń halyqqa esep berý kezdesýinde ótken jyldyń áleýmettik-ekonomıkalyq damýy qorytyndylandy. Aýdan ákiminiń esebine oblys ákimi Ómirzaq Shókeev qatysty.
Aýdannyń shyǵysy men kirisin jik-jikke bólip, halyqqa esep bergen aýdan basshysy ekonomıkaǵa aldaǵy ýaqytta serpin beretin mańyzdy josparlarmen bólisti. Aıtýynsha, 2020 jyly jalpy ınvestıtsııalyq quny 97 mlrd. teńgeden astam qarjyny qurap, 600-ge jýyq adamdy jumyspen qamtıtyn plastmassa jáne munaı-hımııa ónimderin óndirýge baǵyttalǵan 4 jobany iske asyrý kózdelip otyr.
Ordabasy aýdanynyń ónim kólemi byltyr 79, 2 mlrd teńgeni quraǵan. Kiristiń basym bóligi ónerkásip pen aýylsharýashylyǵy salasyna tıesili. Aýdanda búginde tamaq ónerkásibi, farmatsevtıka, metallýrgııa, mashına jasaý, qurylys salasy men ken óndirý ónerkásibi syndy kásiptermen aınalysatyn 35 kásiporyn qyzmet kórsetedi. Sonyń arqasynda halyq turaqty jumyspen qamtylyp keledi. El aldynda sóz alǵan oblys basshysy aýdanda atqarylyp jatqan jumystarǵa toqtalyp ótti.
«Men ákimderdiń esebine baǵa berý úshin kelmeımin. Baǵany sizder beresizder. Basshy jumysynyń nátıjesin halyq ózi-aq kóredi. Ákimder halyqqa jaqyn bolýy tıis. Al ár aýdan ózin-ózi qamtamasyz ete alatyndaı dárejege jetýi kerek. Investor tartýdy myqtap qolǵa alǵan jón. Mysaly, osy Ordabasy aýdanynda Izraıl elinen kelgen ınvestorlar qarbyzdy sýsyz egip jatyr. Osyndaı jańalyqtardy úırenýge bolady. Arysqa AQSh ınvestorlary kelip jatyr. Olar spýtnıkten kórip, tabıǵaty qolaıly ekenin zerttegen. Sóıtip biregeı joba usyndy. Jańashyldyqqa jaqyn bolaıyq. Jańalyq ashýǵa qumar bolaıyq. Ákim bıznespen bir tilde sóılese bilýi kerek. Ázirge bizdegi ár kásipkerdiń salyǵy 100 myń teńgeden aspaı otyr», - dedi aımaq basshysy Ómirzaq Estaıuly.
Aýyl sharýashylyǵy salasyna toqtalsaq, egis kólemi áldeqaıda artyp 65 374 gektarǵa jetken. Kóbinese sýdy az qajet etetin daqyldarǵa kóńil bólinip otyr. Sońǵy jyldary aýdan aýmaǵynda jylyjaı salýǵa nıet bildirýshilerdiń de qatary artqan. Byltyr jalpy kólemi 72 gektardy quraıtyn búkil jylyjaılardan 8 580,3 tn ónim jınalǵan.
