«Ár adamnyń óz oqıǵasy bar»: bloger Dobryak qyzyqty kontent jasaýdyń qupııasymen bólisti

Sýret salýǵa bala kezinen áýestengen ol keıin anımatsııaǵa qyzyǵýshylyq tanyta bastaǵan.

— Bala kezimnen sýret salatynmyn. Keıin sýretterdi túrli baǵdarlamalar arqyly «jandandyrýǵa» bolatynyn bildim. Muny únemi armandap júretin edim. Sóıtip anımatsııa salasynda ózimdi baıqap kórgim keldi. Barlyǵy sol qyzyǵýshylyqtan bastaldy, — dedi spıker.

Alekseı Dobrıak úshin anımatsııanyń basty artyqshylyǵy — emotsııany erkin ári áserli etip kórsetý múmkindigi. Sonymen qatar ol mundaı kontentti ár jastaǵy kórermen tamashalaı alatynyn da atap ótti.

— Anımatsııa — emotsııany jetkizýdiń eń áserli tásili. Munda sezimdi ásirelep kórsetýge múmkindik bar. Ony eresekter de, jasóspirimder de, balalar da kóre alady, — dedi bloger.

Rolık ázirleýge ketetin ýaqyt onyń formaty men kúrdeliligine baılanysty. Qarapaıym túsirilim men montaj birneshe kúnde aıaqtalsa, sýretpen jumys isteý áldeqaıda uzaqqa sozylady.

— Túsirilim men montaj — eń ońaı bóligi. Ony birneshe kúnde aıaqtaýǵa bolady. Al bárin sýretpen kórsetý kerek bolsa, kóp ýaqyt ketedi. Mysaly, Ejelgi Grekııa, skandınav mıfteri týraly jumystarym bar. Onyń rolıgin jasaýǵa bir aıdaı ýaqyt ketti, — dedi ol.

Jańadan blog júrgize bastaǵandarǵa Alekseı eń aldymen oqıǵany durys quryp, ony qyzyqty baıandaýdy úırenýge keńes beredi.

— Eń bastysy — áreket etý jáne qyzyqty oqıǵalar aıta bilý. Mektepte jaqsy oqyp, shyǵarma jazýdy da úırený kerek. Óıtkeni keı adamdar oqıǵanyń basyn, ortasyn jáne sońyn durys qura almaıdy. Negizinde ár adamnyń ómirinde bólisetin dúnıe kóp. Tek sony qyzyqty baıandap, óz oıyńdy durys bildirýdi úırený qajet, — dedi Alekseı Dobrıak.

Aıta keteıik, búgin Comic Con Astana 2026 festıvaliniń ekinshi kúni ótip jatyr. Pop-mádenıet jankúıerleriniń basyn qosqan festıval 6 tamyzda bastaldy jáne 9 tamyzǵa deıin jalǵasady.