Ár adamnyń daýsy – el bolashaǵyn aıqyndaıtyn tańdaý
QOSTANAI. KAZINFORM – Jańa Konstıtýtsııa Qazaqstannyń aldaǵy ondaǵan jyldardaǵy ornyqty damýynyń berik irgetasy bolmaq. Jumysshy eńbegi – memlekettiń negizi, al eńbekqorlyq eldiń basty qundylyqtarynyń birine aınalýy tıis. Bul ustanym Eurasian Resources Group quramyndaǵy Sokolov-Sarybaı taý-ken óndirý birlestigi AQ ujymyna jaqyn.
Búginde kásiporynnyń óndiristik alańdarynda 12 myńnan astam qyzmetker eńbek etedi. Kenshiler jańa Konstıtýtsııanyń qabyldanýy elimizdiń osyǵan deıingi damý kezeńin qorytyndylap, memleket damýynyń jańa satysyna jol ashatynyna senimdi.
Ujym ókilderiniń pikirinshe, konstıtýtsııalyq reforma – basymdyqtar júıesiniń naqty kórinisi. Sonyń ishinde turaqtylyq, basqarymdylyq jáne birizdilik qaǵıdattary erekshe mánge ıe.
Sonymen qatar «eńbek qaýipsizdigi – memlekettiń mindeti» degen normanyń bekitilýi óndiris salasy úshin mańyzdy sheshim retinde baǵalanyp otyr. Qyzmetkerler óndiristegi adam ómirine qaýip tóndiretin ekonomıkalyq maqsattardy nemese salanyń ereksheligin eshbir jaǵdaıda aqtaýǵa bolmaıtynyn atap ótedi. Endigi jerde memleket pen jumys berýshi jaraqattaný, óndiristik apattar men kásibı aýrýlardyń aldyn alýǵa tikeleı jaýapty bolady.
– Konstıtýtsııalyq ózgerister tek búgingi kúnniń emes, uzaq merzimdi turaqty damýdyń alǵysharttaryn aıqyndaıdy. Ónerkásip salasy úshin bul aıryqsha mańyzdy. Munda adam, eńbek qaýipsizdigi, áleýmettik turaqtylyq jáne ekonomıkalyq ortanyń sapasy sóz bolyp otyr, – dedi Shýhrat Ibragımov. – Jańa Konstıtýtsııa eńbek adamynyń rólin nyǵaıtady. Jaýapkershilik tepe-teńdigin qalyptastyryp, óndiristi damytý men qyzmetkerler múddesin qorǵaý ózara baılanysty mindetke aınalady. Sondyqtan referendýmǵa qatysý – ár azamattyń el damýynyń erteńgi baǵytyn aıqyndaıtyn sanaly tańdaýy.
Taý-ken kásipornynyń qyzmetkerleri konstıtýtsııalyq ózgeristerdiń mánin túsinetinin jáne olardy qoldaýǵa daıyn ekenin bildirdi.
Olar qazaqstandyqtardy aldaǵy referendýmǵa qatysyp, óz tańdaýlaryn jasaýǵa shaqyrdy.