Ár adam óz otbasyndaǵy tárbıege kóńil bólýi kerek — eks-depýtat Nurtóre Júsip
ASTANA. KAZINFORM — Belgili qoǵam qaıratkeri Nurtóre Júsip «Adyrna» portalyna bergen suhbatynda búgingi qoǵam mádenıeti, jas urpaq tárbıesi jáne ádebıet máselesi jóninde pikir bildirdi.
Onyń sózinshe, qazaq qoǵamynda amandasý mádenıetine qaıta mán berý qajet.
– Búginde dastarqan basynda otyrǵan adamdarǵa syrttan kelgen kisiniń árqaısysymen jeke-jeke qol alysyp shyǵýy ýaqytty alyp qana qoımaı, ádep pen gıgıena talaptaryna da saı kele bermeıdi, – dedi Nurtóre Júsip.
Onyń kózqarasynsha, mundaı jaǵdaıda «Sálem berdik!» dep kópshilikke ortaq amandasý jetkilikti bolar edi. Sondaı-aq, burynǵy qazaq qoǵamynda «Mal-jan aman ba?» dep amandyq surasý qalypty dástúr bolǵanyn eske salyp, memlekettik tildegi amandasý mádenıetin jańǵyrtý qajet ekenin aıtty.
Budan bólek, Nurtóre Júsip qoǵamdaǵy máselelerdi syrttaı synaýdan buryn ár adam óz otbasyndaǵy tárbıege kóńil bólýi kerek ekenin aıtty. Onyń pikirinshe, eńbekqorlyq, adaldyq, jaýapkershilik jáne úlkendi qurmetteý sııaqty qasıetter eń aldymen otbasynda qalyptasady.
– Qoǵamdaǵy barlyq másele úshin tek memleketti kinálaý durys emes. Ár azamat óz isine jaýapkershilikpen qarap, qoǵamnyń damýyna úles qosýy tıis. Sanaly qoǵam ár adamnyń óz mindetin adal atqarýynan bastalady, – dedi ol.
Sonymen birge, qoǵam qaıratkeri ósip kele jatqan býynnyń tárbıesi men qundylyqtary qandaı bolýy qajet ekeni týraly oıyn bólisti. Onyń sózinshe, jastardyń ómirlik maqsaty qymbat telefon men sándi kólik sekildi materıaldyq qajettilikterdi óteýmen ǵana shektelmeýi kerek.
– Adamdyq pen nadandyqtyń máńgilik maıdanynda jas urpaqtyń ar men uıattyń, namystyń jolyn tańdaýy asa mańyzdy. Qur kórseqyzarlyq, kórealmaýshylyq jáne bos sóz adamdy nadandyq jeteginde qaldyratyndyqtan, árbir jas eń aldymen aınalasyna, eli men jurtyna paıdasy tıetin shynaıy azamat bolýǵa umtylýy qajet, – dedi ol.
Nurtóre Júsip búgingi jastardy tek syrtqy jyltyrǵa qyzyqpaı, ishki rýhanı álemin baıytýǵa, jan dúnıesiniń suranysyn óteýge muqııat bolýǵa shaqyrady. Abaı atamyz nusqaǵan adamdyqtyń aq joly men ımandy kúsheıtý – árbir jastyń basty maqsat-muratyna aınalýy tıis.
Sóz óneriniń búgingi máseleleri de onyń nazarynan tys qalǵan joq. Jazýshylarymyz ótken kúnniń qasireti men batyrlardy jaza bermeı, búgingi qala ómirine kóshýi kerek deıdi Nurtóre Júsip.
– Biz tek at ústinde júrgen kóshpeli halyq emespiz, sonaý Otyrar men Syǵanaqtan bastap qala salyp, mádenıet qurǵan ultpyz. Sondyqtan búgingi ádebıet artqa qaraılaı bermeı, jańa tehnologııa zamanyndaǵy qala qazaǵynyń bolmysyn jazýy tıis, – dedi ol.
Nurtóre Júsiptiń paıymdaýynsha, álemdik jazýshylar sekildi bizdiń qalamgerler de aramyzda júrgen qarapaıym halyqtyń taǵdyryn arqaý etýi qajet. Sonaý ótken tarıhqa tamsana bergennen búgin eshteńe ózgermeıdi. Qazirgi qalalyqtardyń kúndelikti tirshiligi men ishki arpalysy – jańa zaman kitaptarynyń basty sıýjeti bolýy tıis.
Aıta keteıik, buǵan deıin Nurtóre Júsiptiń qazaqtardan da óz Ilon Maski shyǵýy ábden múmkin ekeni jónindegi pikirin jarııalaǵanbyz.
