Ár adam qart ata-anasyna Deepfake týraly aıtyp, aqparat berip otyrǵany jón – IT mamany
ASTANA. KAZINFORM — Jasandy ıntellektiniń deepfake tehnologııasy alaıaqtardyń jańa quralyna aınaldy. Bul tásil arqyly kez kelgen adamnyń túri men daýysyn shynaıy beıneleıtin vıdeo jasaýǵa bolady.
Bul týraly Jibek Joly arnasynyń «Búgin LIVE» baǵdarlamasyna suhbat bergen jasandy ıntellekt sarapshysy Danııal Erlanuly málimdedi.
Mamannyń aıtýynsha, jaqynda áleýmettik jelilerde «aýrýhanadamyn» dep, jylap otyryp aqsha suraǵan adamnyń vıdeosy taraǵan. Keıin 6 mıllıonǵa jýyq qaralym jınaǵan bul vıdeonyń JI kómegimen jasalǵany anyqtalǵan.
– Alaıaqtar arasynda eń damyǵan aldaý túri – deepfake arqyly adamnyń túri men daýysyn ózgertip, aqsha suraý. Kez kelgen ata-ana balasy jylap, «aýrýhanaǵa tústim» dep habarlassa, qorqyp, birden senip qalady. Eń birinshi, beıtanys nómirden jazsa, ózińizdiń balańyzdyń telefon nómirine habarlasý qajet. Qońyraý shalyp, bul vıdeo shynaıy ma, joq pa, sony bilý kerek. Eger jaýap bermeı jatsa, janyndaǵy dostaryna habarlasyp, mán-jaıdy anyqtaý qajet, – deıdi sarapshy.
Mamannyń aıtýynsha, ár adam ata-analary men jaqyndaryn alaıaqtardyń túrli aıla-tásilderi týraly únemi eskertip otyrǵany jón.
– Bul tusta ata-analarǵa jasandy ıntellektiniń qyr-syry jaıly tolyq aqparat berý kerek. Ár jańa tásil shyqqan saıyn ony kórsetip, túsindirip, osyndaı alaıaqtyq tásil bar ekenin aıtyp, ımmýnıtet qalyptastyrǵan durys. Qazir jasandy ıntellektiniń túrli quraldary paıda boldy. Júzdegen, myńdaǵan tásil bar. Bir ǵana saıt emes, ártúrli saıttar bar. Kúnnen kúnge barlyq vıdeolarymyz múmkindiginshe shynaıy kórinetindeı damyp otyr. Jasandy ıntellekt sapasy nashar fotosýret nemese eski sýretti de joǵary sapada tiriltip, sóıletip bere alady, – deıdi Danııal Erlanuly.
Jasandy ıntellektiniń paıdaly tustary da az emes. Osy oraıda Danııar Erlanuly jahandaný dáýirinde tehnologııanyń qarqyndy damýynyń paıdasyn da atap ótti.
– Kóp adamdar jasandy ıntellektige tyıym salý kerek dep oılaıdy. Men mundaı pikirmen kelispeımin, óıtkeni mıllıondaǵan adam ony óz ıgiligine paıdalana alady. Mysaly, múmkindigi shekteýli azamattar bar. Olar kınoǵa túsip, bloger bolamyn dese, jasandy ıntellekti arqyly armanyn júzege asyra alady. Mysaly, aldaǵy bes jylda jasandy ıntellekt kıno salasyna kóp kómegin tıgizedi dep oılaımyn. Gollıvýdta kınolardy jasaý úshin myńdaǵan adam jumys istese, jasandy ıntellekt arqyly bir adam da mýltfılm túsire alady. Qarapaıym quraldarmen, noýtbýk arqyly aýyl turǵyny da joǵary sapada fılm shyǵara alady, – deıdi ol.
Eske sala keteıik, jaqynda jasandy ıntellekt Almatyda qaterli isikti erte anyqtaýǵa kómektesetini týraly jazdyq.
Arýjan Armanqyzy
