Ár adam daǵdarys kezinde ne isteý kerek degen suraqqa bıylǵy Joldaýdan jaýap taba alady - Ómirbek Baıgeldi
ASTANA. QazAqparat - Daǵdarys kezeńinde ár adam ne isteý kerek degen suraqqa bıylǵy Elbasy Joldaýynan jaýap tabýǵa bolady. Búgin Astanadaǵy Táýelsizdik saraıynda QR Prezıdentiniń Qazaqstan halqyna Joldaýynan keıin óz pikirimen bólisken belgili qoǵam jáne memleket qaıratkeri Ómirbek Baıgeldi osylaı dedi.
«Qazir Qazaqstanǵa ǵana emes, álem úshin de jaǵdaı máz emes. Bul daǵdarys burynǵydan tereńirek, qattyraq bolyp jatyr. Osyǵan baılanysty Elbasy óziniń Joldaýynyń baǵytyn daǵdarystan qalaı shyǵamyz degenge saı etip keltiripti. Bul quptarlyq másele. Eldi tyǵyryqtan, qıynshylyqtan shyǵarýdyń joldary taratylyp, uzaq áńgime aıtyldy. Ár óńirdiń qaı salasynda ne istelýi kerektigi, ár basshy, ár mınıstrden bastap, tipti árbir azamat ne isteýi kerek degen suraqqa osy Joldaýdan jaýap tabýǵa bolady», - dep atap ótti Ó. Báıgeldi.
Onyń aıtýynsha, Elbasy ustanymyn halyqqa durys jetkizý búgingi kúnniń ózekti máselesi. Óıtkeni, onda barlyq máseleler jan-jaqty qamtylyp otyr. «Qarapaıym máseleniń biri - únemshildik. Dúnıeni bosqa shashpaý. Sol turǵydan alǵanda Prezıdent mundaı kezeńde halyqtyń qazyna qarjysyn eń aldymen paıda beretin tusqa bólý kerektigin nusqap otyr. Sondyqtan da, qazirgi kezde mınıstrden bastap qarapaıym halyq ta oılanýy kerek. Álbette, qazirgi kúıdiń aýyr ekeni ras. Degenmen, Qazaqstannyń ár baǵyttaǵy áleýeti barshylyq. Biz soǵan senimdimiz», - dedi Ó. Baıgeldi.
