Ár abonentke SIM-karta sanyn shekteý usynysy áli talqylanýy kerek — Tsıfrlyq damý mınıstrligi

ASTANA. KAZINFORM — Elimizde jaqyn arada ár adamǵa SIM-karta sanyn shekteý engizilgeli jatqan joq. Bastama áli tolyqqandy talqylaýdy talap etedi. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmeti habarlady.

Kazinform agenttigi Májilis otyrysynda aıtylǵan ár adamǵa SIM-kartalar sanyn shekteý týraly usynysqa qatysty QR Tsıfrlyq damý, ınnovatsııalar jáne aeroǵarysh ónerkásibi mınıstrligine suraý salǵan edi. Vedomstvo bul másele áli jaı usynys kúıinde turǵanyn, áli tıisti organdarmen tolyqqandy talqylaýdy talap etetinin málimdedi. 

«Abonentterdiń, abonenttik nómirlerdiń (SIM-kartalardyń) shekteýli sanyn paıdalanýyna qatysty aıtar bolsaq, ol alaıaqtyqqa qarsy is-qımyl quraldarynyń biri retinde usynys retinde aıtyldy. Qazirgi ýaqytta abonentterdiń abonenttik nómirlerdiń (SIM-kartalardyń) shekteýli sanyn paıdalanýyna qatysty normany engizý máselesi memlekettik organdarmen, uıaly baılanys operatorlarymen jáne naryqtyń basqa da qatysýshylarymen egjeı-tegjeıli zerdeleýdi jáne talqylaýdy talap etedi. Osy máseleni egjeı-tegjeıli pysyqtaǵannan keıin biz ony qoǵamdyq talqylaýǵa shyǵarýǵa daıyn bolamyz, sodan keıin ǵana qoldanystaǵy erejelerge ózgerister engizý boıynsha qandaı da bir is-qımyl jasalatyn bolady», — delingen habarlamada. 

Aıta keteıik, bıyl naýryz aıynda Parlament Májilisinde kıberqylmyspen kúres taqyrybyna arnalǵan talqylaýda elimizde bir kisige satylatyn SIM kartanyń sanyn shekteý usynylǵan bolatyn.