Aqmola Invest-te ınvestorlardy qorǵaý jónindegi jańa sharalar qaraldy
KÓKShETAÝ. KAZINFORM - Aqmola Invest keńsesinde Aqmola oblysynyń ákimi Marat Ahmetjanovtyń tóraǵalyǵymen ınvestıtsııalar jáne ınvestorlardyń quqyqtaryn qorǵaý máseleleri boıynsha birlesken keńes ótti.
Іs-sharaǵa QR Bas prokýrorynyń birinshi orynbasary Jandos Ómirálıev, QR Bas prokýratýrasynyń Investorlardyń quqyqtaryn qorǵaý komıtetiniń tóraǵasy Baýyrjan Eraly, QR Bas prokýratýrasynyń Quqyqtyq statıstıka jáne arnaıy esepke alý komıtetiniń tóraǵasy Sabıt Nurlybaı, oblystyq prokýratýra ókilderi, ındýstrııalyq aımaqtar jáne iri ınvestorlar qatysty. Kezdesý barysynda árbir ınvestordyń quqyqtaryn qorǵaý sharalary talqylandy.
Marat Ahmetjanov óńirdiń joǵary ınvestıtsııalyq belsendiligin atap ótti: 2025 jyly negizgi kapıtalǵa salynǵan ınvestıtsııalar kólemi 900 mlrd teńgeden asyp, 2024 jylmen salystyrǵanda 1,5 esege artqan.
- Memleket basshysy ınvestıtsııa tartýdy ekonomıkalyq saıasattyń negizgi basymdyqtarynyń biri retinde belgiledi. Óńirde jalpy somasy 45 mlrd teńgeden asatyn 108 jeke joba júzege asyrylyp, 1,7 myńnan astam jumys orny quryldy. «Aqmola» ındýstrııalyq aımaǵy qarqyndy damyp keledi, astyqty tereń óńdeý, mal sharýashylyǵy, qurylys materıaldary jáne energetıka salalarynda iri jobalar iske asyrylyp keledi. Árbir joba ashyqtyqpen, sheshim qabyldaýdyń jedeldigimen jáne memleket tarapynan naqty qorǵaýmen qamtamasyz etilýi tıis, ınvestorlarǵa formaldy kózqarasqa jol berilmeıdi. Bul rette prokýratýra organdary men ınvestorlardyń quqyqtaryn qorǵaý komıtetine erekshe ról júkteledi, olar ótinishterge jedel áreket etýdi jáne jobalardy negizsiz tekserýlerden qorǵaýdy qamtamasyz etedi, – dep atap ótti óńir basshysy.
QR Bas prokýrorynyń birinshi orynbasary Jandos Ómirálıev ınvestıtsııalardy qorǵaý Bas prokýratýranyń basym baǵyttarynyń biri ekenin atap ótti, óıtkeni senim – olardy elge tartýdyń basty sharty.
- Investorlardyń quqyqtaryn qorǵaý komıteti quryldy, prokýrorlyq súzgi engizildi, oǵan sáıkes sheshimder tek prokýratýranyń kelisimimen qabyldanady, 27 myńnan astam is qaraldy. Sondaı-aq tsıfrlyq qadaǵalaý men ınvestorlardy súıemeldeý júıesi damýda, ár ınvestorǵa jeke prokýror bekitiledi, bul 2 myńnan astam daýdy sheshýge múmkindik berdi. Budan bólek, prokýratýra organdaryna ınvestıtsııalyq ombýdsmenniń fýnktsııalary berildi, – dedi Jandos Ómirálıev.
Keńes qorytyndysy boıynsha óńirdiń ınvestıtsııalyq ahýalyn jaqsartý maqsatynda memlekettik organdar men ınvestorlar arasynda ózara yntymaqtastyq týraly memorandýmǵa qol qoıyldy. Qujat Komıtetti memlekettik organdar tarapynan ınvestorlarǵa qatysty negizsiz tekserýlerden, sonyń ishinde ruqsat qujattaryn sebepsiz sozbalańǵa salýdan qorǵaıtyn «qorǵanysh súzgisi» retinde bekitedi. Memlekettik organdar «pýlǵa» kiretin ınvestorlarǵa qatysty kez kelgen shekteý sharalaryn prokýratýramen kelisýge mindetti.
- Árbir ınvestıtsııalyq joba – bul óńir ekonomıkasyna qosylǵan úles, jańa jumys oryndary jáne halyq tabysynyń ósýi. Árbir ınvestor memleket tarapynan naqty qorǵaýdy sezinýi tıis, – dep qorytyndylady óńir basshysy.
