«Aqjaiyq» telearnasy halyqaralyq festıvaldiń júldegeri atandy
ORAL. QazAqparat - «Aqjaiyq» telearnasy Reseıdiń Tolıattı qalasynda ótken VІІ halyqaralyq sporttyq kıno jáne televıdenıe festıvaliniń júldegeri atandy, dep habarlaıdy QazAqparat tilshisi.
Telearna redaktory Nına Pavlychevanyń «Molodej Life» habary «Úzdik telebaǵdarlama» atalymy boıynsha qola júldege ıe boldy.
N.Pavlychevanyń aıtýynsha, barlyǵy 72 jumys «Sport jáne tulǵa», «Sport jáne qoǵam» taqyrybynda úzdik derekti fılm» jáne «Úzdik sporttyq telebaǵdarlama» atalymdary boıynsha sarapqa túsken. Telefılmder men habarlar «Aerohol» kınoteatrynda kórsetilip, olardy talqylaýǵa kórermender de qatysty. Máskeý, Tolıattı, Ýfa, Ekaterınbýrg, Samara, Rıazan qalalarynan kóptegen jumystar boldy. Solardyń ishinen Tolıattı jáne Ýfa qalalarynyń ókilderi alǵashqy eki oryndy enshilese, «Molodej Life» habary úzdik úshtikti túıindedi.
Nına festıvalǵa sportpen aınalysatyn múmkindigi shekteýli jandar jónindegi telebaǵdarlamasyn jibergen bolatyn. Munda olardyń múmkindigi shekteýli bolsa da, ómirde úlken tabystarǵa qol jetkeni, aldaǵy jarystarǵa daıyndalyp jatqany aıtylady.
Mysaly, múmkindigi shekteýli jandarǵa arnalǵan sport klýbynyń jetekshisi, sportshy ári bapker Azon Shaımardanovty kópshilik jaqsy biledi desek, artyq aıtqandyq emes. Ol - voleıbol men paýerlıftıngten sport sheberi, otyryp voleıbol oınaýdan 11 márte Azııa chempıony, Býsanda (Ońtústik Koreıa) ótken Azııa oıyndarynyń kúmis júldegeri, qol kúresinen ashyq Azııa kýbogynyń jeńimpazy. 1992 jyly aýyr kesepatqa tap bolyp, ekinshi top múgedegi atanǵan Azon sonyń bárin qaımyqpastan kóterip, sportpen aınalysý arqyly osyndaı bıikterge qol jetkize bildi.
Eki jyldan beri efırge shyǵyp kele jatqan «Molodej Life» baǵdarlamasy sonymen qatar mádenıet, ǵylym taqyryptaryn da qamtıdy.
«Bıyl da halyqaralyq deńgeıde ótken atalmysh festıval aýqymyn keńeıtý kózdelýde. Aldaǵy jyly ol álemdik deńgeıde ótip, AQSh, Nepal jáne basqa elderden ókilder kelmekshi», dedi QazAqparat tilshisine N.Pavlycheva.
Aıta keteıik, qazaq tilinde de taza sóıleıtın Nına Nıkolaıqyzy «Aqjaiyq» telearnasynda tórt jyldan astam ýaqyt boıy qyzmet etip keledi. Efırge buryn «Meniń elim osyndaı», «Zvýchı dombyra drýjby», «Kazahstan - nash obşıı dom» baǵdarlamalaryn daıyndasa, qazirgi kezde «Molodej Life» habarymen tanymal. Sonymen qatar, radıodan «Dýhovnost», «Glavnye prıorıtety», «Zdorove» habarlary shyǵyp júr.
