Aqerke: Dımashtyń jańa beınebaıany jaryqqa shyqty
ASTANA. KAZINFORM – Búgin, 31 shildede Qazaqstannyń Halyq ártisi Dımash Qudaıbergen óziniń YouTube arnasynda qazaqtyń halyq áni Aqerke shyǵarmasynyń zamanaýı nusqasyn kópshilikke usyndy, – dep jazdy dimashnews.com.
Bul týyndy uzaq jyldar boıy halyq ánshileriniń oryndaýynda dombyranyń súıemeldeýimen shyrqalyp kelgen. Ándi keńinen tanytqan eń kórnekti oryndaýshylardyń biri – HH ǵasyrdaǵy kórnekti qazaq ánshisi ári kompozıtory Ǵarıfolla Qurmanǵalıev.
Mýzykalyq prodıýser retinde Dımash mýzykant Renat Aýbakırov jáne saýnd-prodıýser Erlan Bekchýrınmen birlesip, ándi jańasha óńdep, óz kózqarasyn usyndy. Mýzykanttar shyǵarmanyń dástúrli bolmysyn uqyptylyqpen saqtaı otyryp, ony zamanaýı mýzykalyq sheshimdermen tolyqtyra bildi.
Ánniń jańa nusqasynda Dımashtyń daýysy ǵana emes, sonymen qatar Ǵarıfolla Qurmanǵalıevtiń tarıhı muraǵattyq jazbalarynan alynǵan úzindiler de estiledi, sonyń arqasynda ótken men búginniń arasyndaǵy ózindik mýzykalyq úndestik qalyptasty.
Aqerke ánine túsirilgen beınebaıan Almaty qalasynda jáne ánshiniń týǵan jeri – Aqtóbede túsirildi. Túsirilim jumystary jerde, sýda jáne áýede júrgizilip, túrli tabıǵı kórinisterdi bir týyndyǵa toǵystyrdy.
Túsirilim jumystaryna 130 adamnan turatyn úlken shyǵarmashylyq top qatysty. Sonymen qatar Aqtóbedegi Qobylandy batyr atyndaǵy Ortalyq stadıonda Dımashtyń 10 myńǵa jýyq jerlesi jınalyp, ánge arnalǵan áserli beınebaıannyń túsirilimine qatysty.
Dımash Qudaıbergen Aqtóbeniń ortalyq stadıonynda beınebaıan túsirip jatqanyn jazǵan edik.
Aqtóbege kelgen sheteldikter el maqtanyshy Dımash Qudaıbergenniń týyp-ósken úıine, mektebi men kolledjine barady. Sonymen birge Aqtolaǵaı borly taýlaryn kóredi. Kazinform Aqtóbeniń úzdik týrmarshrýttaryn tizbektedi.
