APV vaktsınasy uldarǵa da salynady: bedeýlikke qatysty qaýeset qanshalyqty ras
ASTANA. KAZINFORM — 2027 jyldan bastap 11 jastaǵy uldarǵa adam papılloma vırýsyna (APV) qarsy vaktsına salý josparlanyp otyr. Sarapshylardyń aıtýynsha, mundaı tájirıbe álemniń birqatar elinde bar.
— Vaktsına tek qyzdarǵa salynbaıdy. Qazir kóptegen elde bul ekpeni uldar da alady. Mysaly, AQSh-ta vaktsına uldar men qyzdarǵa 11-12 jasta usynylady. Ulybrıtanııada 12-13 jastaǵy oqýshylarǵa mektepte salynady. Avstralııa da vaktsınatsııa baǵdarlamasyna ul balalardy engizgen, — dedi QR DSM Sanıtarııalyq-epıdemıologııalyq baqylaý komıtetiniń basqarma basshysy Jasulan Alpysbaev Jibek Joly telearnasynyń «Búgin Live» baǵdarlamasynda.
Qazaqstanda vaktsınatsııany dál 11 jastan bastaý josparlanyp otyrǵany beker emes.
— Adam papılloma vırýsy jatyr moıny obyrymen ǵana baılanysty emes. Ol er adamdarda aýyz-jutqynshaq, jynys músheleri jáne basqa da qaterli isik túrleriniń paıda bolý qaýpin arttyrýy múmkin. Uldardy vaktsınatsııalaý olardyń densaýlyǵyn qorǵaıdy. Vırýstyń taralýyn da azaıtady, — dedi spıker.
Elimizde APV-ǵa qarsy vaktsınatsııa 2024 jylǵy qyrkúıekte bastalǵan. Qazir ekpe 11-13 jastaǵy qyzdarǵa salynyp, Profılaktıkalyq egýlerdiń ulttyq kúntizbesine engizildi. Vaktsınatsııa erikti túrde júrgiziledi, ekpe ata-anasynyń nemese balanyń zańdy ókiliniń kelisimimen ǵana jasalady.
Búginde ul balalardy qamtý máselesimen qatar, vaktsınanyń qaýipsizdigine qatysty suraqtar qoǵam nazarynda. Ásirese áleýmettik jelilerde túrli qaýeset tarap jatyr.
— Vaktsına «bedeýlikke aparady» degen qaýesetke mán bermeý qajet. Bul — profılaktıkalyq shara. Resmı aqparattarǵa súıengen durys, — dedi Jasulan Alpysbaev.
Eske salaıyq, Qazaqstanda vaktsınalardy saqtaý temperatýrasy onlaın baqylanbaq.
