APV-ǵa qarsy vaktsına bedeýlikke ákelmeıdi – QazORǴZI
ASTANA. KAZINFORM – Adam papıllomasy vırýsyna (APV) qarsy vaktsına bedeýlikke ákelmeıdi. Muny Qazaqstandyq onkologııa jáne radıologııa ǵylymı-zertteý ınstıtýtynyń (QazORǴZI) zertteýleri men resmı derekteri rastaıdy. Bul týraly Astana qalasynyń sanıtarııalyq-epıdemıologııalyq baqylaý departamentiniń basshysy Aıgúl Shaǵaltaeva Óńirlik kommýnıkatsııalar qyzmetinde ótken brıfıngte málimdedi.
Onyń aıtýynsha, APV-ǵa qarsy vaktsınanyń negizgi maqsaty – áıelderdiń reprodýktıvtik aǵzalaryn onkologııalyq aýrýlardan qorǵaý.
– QazORǴZI zertteýleri men resmı derekterine sáıkes, 2013–2015 jyldary júrgizilgen APV-ǵa qarsy vaktsınatsııanyń pılottyq baǵdarlamasyna qatysqan 131 áıeldiń sońǵy on jyl ishinde bir nemese eki deni saý sábı dúnıege ákelgeni tirkeldi. Bul derekter vaktsınanyń áıelderdiń reprodýktıvtik densaýlyǵyna keri áser etpeıtinin kórsetedi, – dedi Aıgúl Shaǵaltaeva.
Spıkerdiń sózinshe, ekpe ýaqytynda salynsa, adam papıllomasy vırýsymen alǵash baılanysqa túskenge deıin aǵzada ımmýnıtet qalyptasady. Sonyń nátıjesinde jatyr moıny obyrynyń damý qaýpi edáýir tómendeıdi.
Eske sala keteıik, Qytaı ǵalymdary bedeýlikti emdeýdiń jańa tásilin tapty.
