Aptap ystyqtan Ispanııada bir aıda 2,1 myń adam qaıtys boldy

MADRID. QazAqparat - Karlos III densaýlyq ınstıtýtynyń málimetinshe, Ispanııada aýa temperatýrasynyń shamadan tys joǵarylaýynan 2176 adam kóz jumdy. Resmı málimetke sáıkes, 2015 jyldan beri bolǵan ólim-jitimniń eń joǵary kórsetkishi tirkelip otyr. QazAqparat bul týraly Euronews-ke silteme jasap habarlaıdy.

Ispanııanyń otbasylyq jáne jalpy tájirıbelik dárigerler qoǵamynyń ókili Lorentso Armenteros adamdardyń deni jylý stresinen qaıtys bolyp jatqanyn aıtady.

«Ólim-jitimniń kóbine jylý stresi sebep bolǵan. Ol birden birneshe múshege keri áserin tıgizip, kóptegen músheler qyzmetiniń isten shyǵýyna jáne sonyń saldarynan ólimge ákelýi múmkin», - dedi Lorentso Armenteros.

11-17 shilde aralyǵyndaǵy aptada Ispanııa jalpy Eýropada ólim kórsetkishi eń joǵary el boldy.

Zertteýshiler buǵan sebep retinde aptap ystyq, koronavırýs indetiniń saldary jáne marqumdardyń egde jasyn ataıdy. Qaıtys bolǵandardyń kópshiligi – 85 jastan asqandar.

Eldiń basym bóliginde aýa raıyna baılanysty eskertý jarııalandy. Ispanııa bıyl eki ret aptap ystyqty bastan ótkerdi, ondaǵy aýa temperatýra birneshe kún qatarynan Tselsıı boıynsha 40 gradýstan asqan.

Foto: ru.euronews.com