Aptap ystyqta qyzylordalyq dárigerler kúsheıtilgen kestemen jumys jasaýda
QYZYLORDA. QazAqparat - Qyzylordada aptap ystyqtan zardap shegýshilerdiń sany artqan. Ásirese, júrek aýrýy bar jáne qan qysymy qubylmaly turǵyndarǵa tipten qıyn soǵýda, dep habarlaıdy QazAqparat tilshisi.
Osy oraıda, Qyzylorda jedel-járdem stansasynyń qyzmetkerleri kúsheıtilgen keste boıynsha jumys jasaýǵa kóshti. Bir táýliktiń ishinde 1500-ge jýyq shaqyrtýlarǵa baryp, naýqastarǵa tıisti em-dom kórsetýde.
«Kúnniń ystyǵyna qaramaı bazarǵa barǵan edim. Úıge kelgennen keıin basym aınalyp, qan qysymym kóterilip ketti. Jedel járdemge habarlastyq. 20 mınýttyń ishinde kelip, tıisti em-dom jasady. Mynadaı aýa raıynda saq bolǵan jón» - deıdi qala turǵyny Hadısha Álmusaeva.
«Kazgıdromettiń» málimetinshe, Qyzylordada aldaǵy kúnderi aýa temperatýrasy áli de joǵarylaı bermek. Qazirdiń ózinde synap baǵanasy 45+ gradýsty kórsetýde. Osy oraıda mamandar turǵyndardan saqtyq sharalaryna kóńil bólýdi suraıdy.
«Múmkindiginshe kún ystyqta dalaǵa nemese alys jolǵa shyqpaǵan durys. Bas aınalý, qusý nemese qan qysymy qubylǵanda dereý dárigerlerdiń kómegine júgingen abzal. Bul rette dári-dármekterdiń jetispeýshiligi baıqalmaıdy. Jedel-járdem shaqyrtýshylardyń sany kún saıyn artýda», - dep málimdedi Qyzylorda oblystyq densaýlyq saqtaý basqarmasynyń baspasóz hatshysy Nurjamal Tursynbaeva.
