Aptap ystyq adam psıhıkasyna áser etedi
ALMATY. QazAqparat – Shildeniń shilińgir ystyǵy turǵyndardyń psıhıkalyq densaýlyǵyna áser etedi. Bul týraly Almaty qalasynyń bas psıhıatry aıtty, dep habarlaıdy QazAqparat tilshisi.
Almaty qalalyq psıhıkalyq saýyqtyrý ortalyǵynyń dırektory Sapar Rahmensheev qatty ystyqta sirkesi sý kótermeı, álsizdik, uıqysyzdyq qaljyratyp, minez-qulqynda ózgerister syr bergen almatylyqtardy medıtsınalyq kómekke júginýge shaqyrdy. Onyń aıtýynsha, aptap ystyq adam aǵzasynda gormonaldy ózgeristerdiń paıda bolýyna túrtki bolady. Munyń nátıjesinde aǵzada dofamın, adrenalın, kortızol, serotonın kóp bólinedi. «Buǵan qosa, búkil dúnıeni tumshalap tastaǵandaı qapyryqta uıqy buzylady, jumys isteýge zaýqy bolmaıdy. Kóńil kúıi tez qubylyp, kúızeliske túsip ketýi ábden múmkin. Mı qyzmetiniń jumysy nasharlaıdy. Kún raıynyń qolaısyzdyǵynan adamdardyń emotsııasyn basqarý múmkindigi tejeledi. Ashýlanshaq, agressııalyq minezdiń aıaq astynan paıda bolýy da ǵajap emes. Degbirsiz kúı, álsizdik, tábettiń bolmaýy psıhologııalyq jaǵdaıǵa áser etedi», - deıdi ortalyq dırektory.
Mamannyń aıtýynsha, ystyq kúnde ózińizdi qorǵaý úshin qarapaıym erejelerdi saqtaý kerek.
«Kún kózinen boı tasalap, suıyqtyqty kóp iship, salqyn jerde demalý kerek. Alkogoldi ónimderdi tutynbaǵan abzal. Aptap kezde psıhıkalyq aýrýǵa shaldyqqan naýqastardyń da densaýlyǵy syr berýi múmkin», - deıdi ortalyq basshysy.
