Aptap pen aıazda pana bolar kempıngter jetkilikti me
AQTÓBE. KAZINFORM — Aqtóbe aýmaǵyndaǵy jolda baılanys nashar. Qazir bul negizgi problema bolyp tur. Al jol boıyndaǵy servıske áli de bolsa jumysshy mamandar qajet. Kazinform tilshisi jol boıyndaǵy qyzmet jaıyn bildi.
Júrgizýshiniń suranysy, kempıng ıesiniń usynysy
Aqtóbe-Atyraý tasjoly arqyly táýligine — 8 myń, Samara-Shymkent tasjoly arqyly táýligine — 12-15 myń kólik júredi. Bul — eki ǵana baǵyttyń aǵyny. Oǵan oblystyq mańyzy bar tasjoldardy da qosýǵa bolady.
Qazir aýdanaralyq avtobýstar, taksı qyzmeti osy joldarda jolaýshylardyń talap-tilegine oraı birneshe kempıngke aıaldaıdy. Kóbi tamaq ishedi, qajet kezde tazalyq bólmesiniń qyzmetin qoldanady.
— El ishinde taksı qyzmetin atqaramyn. Biz úshin birinshi kezekte joldyń jaqsy bolǵany kerek. Aqtóbe oblysy aýmaǵynda oı-shuńqyr kóp. Sonymen birge elimiz boıynsha joldarda baılanys nashar. Kóp jerde múlgigen tynyshtyq ornaǵan. Al kempıng qyzmetine keler bolsam, ózim kóp asa qoldanbaımyn. Keıde aıaldaǵan kezde kórgenimdi aıtar bolsam, saǵat 23:00–den keıin ystyq tamaq tappaısyz. As isher jer joq, dúken jabyq. Al kempıngter tek jatar oryn usynady. Sondyqtan túnde jol júrgende keshki astyń qamyn aldyn ala oılap, josparlaǵan durys, — dedi júrgizýshi Syrym Esenjanov.
Samara-Shymkent, Qostanaı-Qarabutaq tasjoly boıyndaǵy Qarabutaq aýyldyq okrýginde 10 kempıng ornalasqan.
Ásirese Qarabutaq aýylynda jyl saıyn jańa nysan salynyp jatyr. Ári Aqtóbe-Qarabutaq-Ulǵaısyn tasjolynyń qurylysy bastalǵaly beri jer telimin suraýshylar sany artqan.
Al jer bolsa aýktsıon arqyly beriledi.
— Qazirgi kezde moratorıı jarııalandy. Sebebi Aqtóbe-Qarabutaq-Ulǵaısyn tasjoly 4 jolaqty bolyp keńeıtiledi. Onyń jobalyq-smetalyq qujaty bektilgennen keıin ǵana jer telimin bólý qaıta jandanady. Qazirgi kezde aýyldyq okrýgke qarasty Belqopa aýylynda — 2, Jarótkelde — 2, Qaraburaqta — 6 kempıng jumys istep tur. A sanatty kempıng — bireý. Keıbir kempıngter qyzmet kórsetý aıasyn keńeıtip, monsha da salyp jatyr. Jol boıyndaǵy bıznesti damytyp otyrǵan kásipkerler jumysshy jetispeıtinin aıtady. Biri joǵary bilikti aspazdy ózge oblystan ákelip otyr. Olar vahtalyq ádispen jumys isteıdi. Qazirdiń ózinde kúzetshi, eden jýýshy, ydys jýýshy sekildi bos oryndar bar. Munda kólik aǵyny kóp. Beıresmı aqparatqa súıensek, táýligine 13-15 myń mashına ótedi, — dedi Qarabutaq aýyldyq okrýginiń ákimi Keńshilik Baıdrahmanov.
Onyń aıtýynsha, jol boıyndaǵy qyzmet keıingi 10 jylda damı bastady. Sol kezde bastap jerge suranys artty.
— Kásipkerlerden káriz-sorǵy júıesin ortalyqtandyrýǵa usynys boldy. Qazirgi kezde joba daıyndalyp, bıyl iske asyrý josparlanyp otyr. Joba boıynsha úsh qazandyqtan turady. Aǵyndy sý birinshisine túsip, ekinshisine súzgiden ótip jiberiledi. Al úshinshisinde sý býǵa aınalady. Al buǵan deıin aýyl turǵandarymen ortalyq kelisimge kelip, arnaıy oryn qazylyp, tógildi, — dedi Keńshilik Baıdrahmanov.
Kempıngtiń tórt kategorııasy bar
Elimizde kempıng 5 sanat boıynsha salynady. Olar: A, B, C, D, E. Ár sanattyń óz artyqtyshyǵy bar, qyzmet túri ózge.
A sanaty — táýligine 7 myń kólikke qyzmet kórsete alatyn oryn. Munda janar-jaǵarmaı quıý orny, kem degende 25 orynǵa shaqtalǵan qonaqúı, dárethana men jýyný bólmesi, dúkeni bolýy kerek. Sonymen birge tamaqtaný orny bir mezette keminde 40 adam qabyldaýy tıis.
Kólikke tehnıkalyq qyzmet kórsetý, kólik jýý, avtobýs, jeńil kólik pen júk kólikterin bólek ornalastyratyn turaq, kúzet pen alǵashqy medıtsınalyq kómek kórsetý orny qarastyrylady.
Adamdar bos ýaqytty tıimdi ótkizedi jáne demalys aımaǵy da qarastyrylady. Qoǵamdyq jýyný orny men ǵımarat ishinde, jyly jerde ájethana bolýy mindetti.
V sanaty — táýligine myń kólikke qyzmet kórsetedi. Munda janar-jaǵarmaı quıý stansasynyń bolýy mindetti emes. Sonymen birge kempıngtegi jatyn oryn 10-nan kem bolmaıdy. Ózge qyzmettiń bári A sanatyna uqsas keledi.
S, D jáne E sanatty jol boıyndaǵy servıste táýligine 100-den astam kólikke qyzmet kórsetýge jaramdy. Bárine ortaq ereje boıynsha dúken bolýy tıis. Tek úsheýinde de alǵashqy medıtsınalyq kómek kórsetý orny, bos ýaqytty ótkizýge arnalǵan demalys aımaǵy, kúzet qyzmeti, kólik jýý orny, kólikke tehnıkalyq qyzmet kórsetý ortalyǵy, qoǵamdyq dýsh bolmaıdy.
S sanatynda ǵana tamaqtaný orny qarastyrylǵan. Jatyn oryn usyný da mindetti emes.
Kásipkerlik basqarmasynyń málimetinshe, «A», «V», «S» jáne «D» sanatty jol boıyndaǵy servıs obektileri qolaısyz aýa raıy jaǵdaılary kezeńinde jylyný pýnktteri retinde paıdalanylady.
Qazirgi tańda Aqtóbe oblysynda jol boıyndaǵy bıznes qarqyndy damyp jatyr jáne Aqtóbe oblysynda jol boıyndaǵy servıstiń 118 nysany jumys isteıdi.
Onyń ishinde:
- A sanatty — 5 nysan nemese 5%;
- V sanaty — 4 nysan nemese 4%;
- S sanaty — 61 nysan nemese 60%;
- D sanatty — 48 nysan nemese ulttyq standartqa sáıkes keletin 45%.
— Sonymen birge qazirgi tańda keıbir aýdandarda jol boıyndaǵy servıs qurylysy bastaldy. Temir, Qarǵaly aýdandarynda janar-jaǵarmaı, avtogaz quıý stansalary salynyp jatyr. Al Aqtóbe-Astrahan tas joly boıynda kempıng qurylysyna 3 jer telimi berildi. Alǵa aýdanynda dámhana, demalys orny men janar-jaǵarmaı quıý stansasynyń qurylysy bıyl aıaqtalady. Qazirgi tańda jolaýshylar men júrgizýshiler tarapynan shaǵym túsken joq, jaǵdaı birqalypty. Bul kórsetilip otyrǵan qyzmettiń sapasy, qaýipsizdik talaptarynyń oryndalýy syndy negizgi kórsetkishterdiń talapqa saı ekenin kórsetedi. Jolaýshylardyń da, júrgizýshilerdiń de tilekteri men usynystary ýaqytyly eskerilip, tıisti deńgeıde qarastyrylyp otyr, — dedi Aqtóbe oblystyq kásipkerlik basqarmasynyń basshysy Almas Salyqbaev.
Jol boıyndaǵy baılanys
Jol-kólik apaty, borandy kúni eń mańyzdysy — baılanys. Bul — adam ómirin qutqarar qural. Degenmen baılanys ázirge nashar. Keı jerderde múlgigen tynyshtyq ornaǵan.
— Qazirgi tańda jol boıy mobıldi baılanyspen tolyq qamtylmaǵan. Oǵan sebep — mobıldi baılanys stantsııalaryn ornatý úshin arnaıy ınfraqurylym tartylmaǵan. Respýblıkalyq mańyzy bar avtojoldardyń boıynda úzdiksiz baılanyspen qamtý maqsatynda Aqtóbe oblysynyń 9 aýdanynda AMS (avtomatty planetaaralyq stantsııa) ornatý úshin 17 núkte (8 jeke, 9 memlekettik) anyqtaldy. Jobalaý-smetalyq qujattama ázirlendi, saraptama júrgizilip jatyr. Barlyǵy 15 núktede saraptamanyń oń qorytyndysy alyndy. Qalǵan 2 núkte boıynsha qorytyndyny kútip otyrmyz, — dedi Almas Salyqbaev.
Aıta keteıik, qazirgi tańda jol boıynda 32 janar-jaǵarmaı, 8 avtogaz quıý stantsııasy bar. Aqtóbe oblystyq statıstıka departamentiniń derekterine súıensek, 2025 jyldyń qańtar-maýsym aılarynda júk aınalymy 108,7%, jolaýshy aınalymy 109,4% qurady. Ekeýinde de ósim bar.
Eske salsaq, byltyr elimizde jol boıyndaǵy ájethanalardy tekserý jumystary júrdi. Jol boıyndaǵy 52 dárethanada sanıtarlyq-epıdemıologııalyq normalardy óreskel buzý faktileri anyqtaldy.