Aptap kúsheıdi: Italııa men Ispanııada qyzyl deńgeıli dabyl jarııalandy

ASTANA. KAZINFORM — Eýropany sharpyǵan aptap ystyq birqatar elde aýa temperatýrasynyń 40°C-tan asyp ketýine sebep boldy, dep habarlaıdy Euronews.

Osyǵan baılanysty bılik ókilderi barynsha saq bolýǵa shaqyryp otyr, sebebi qýańshylyq, qatty jel men aptap orman órtterine ákelýi múmkin.

Italııanyń birneshe óńiri kúnniń qatty ysıtyn kezinde keıbir jumys túrine tyıym salý múmkindigin qarastyryp jatyr. Jeksenbide, ıaǵnı 29 maýsym tańyna qaraı eldiń 21 qalasynda qaýiptiń qyzyl deńgeıi jarııalandy. Bul sharany engizýdi josparlap otyrǵan óńirler qatarynda Latsıo, Toskana, Kalabrııa, Apýlııa jáne Ýmbrııa bar.

Italııa Densaýlyq saqtaý mınıstrligi 27 qalanyń 17-sinde aptapqa baılanysty eń joǵary deńgeıdegi eskertý jarııalady. Olardyń qatarynda Rım, Mılan jáne Neapol da bar. Rımde týrıster Kolızeı men Trevı sýburqaǵy mańynda kóleńke izdep, keıbiri qolshatyr ustap, qalalyq sýburqaqtardan sý iship salqyndaýǵa tyrysqan. Uqsas kórinister Mılan men Neapolda da baıqaldy, onda kóshe satýshylary turǵyndar men týrısterge ystyqtan qorǵanýǵa kómektesý úshin lımonad satqan.

Eýropanyń basqa bólikterinde Ispanııanyń ulttyq meteorologııalyq agenttigi AEMET maýsym aıy tarıhtaǵy eń ystyq aı bolýy múmkin dep eskertti. Sevılıa men eldiń ońtústigindegi basqa qalalarda aýa temperatýrasy 42°C-qa deıin kóteriledi.

Ispanııanyń densaýlyq saqtaý organdary turǵyndarǵa aptap ystyqtyń sharyqtaý sheginde dene júktemelerinen aýlaq bolýǵa jáne sý rejımin saqtaý kerektigin eskertti, ásirese qarttar men balalar sııaqty osal toptarǵa erekshe nazar aýdarylyp otyr.

Sarapshylar Eýropanyń ońtústiginde aptap tolqyndarynyń jıilep, kúsheıýin jahandyq klımattyń ózgerýimen baılanystyrady.

Sondaı-aq Grekııa men Portýgalııada da joǵary temperatýra tirkeldi, bul elderde jergilikti turǵyndar men týrıster aptaptan qorǵanýdyń amaldaryn qarastyryp jatyr.

Budan buryn AQSh-ta buryn-sońdy bolmaǵan aptap ystyqtan poıyzdar toqtatylyp jatqanyn jazyp edik.