Aptap ystyqtyń saldarynan Aýstralııada 300 myń gektardan astam orman órtke orandy

ASTANA. KAZINFORM — Aýstralııanyń Vıktorııa shtatynda anomaldy ystyqtyń saldarynan shyqqan órt 300 myń gektardan astam orman alqabyn kúlge aınaldyrdy. Bul týraly Guardian basylymy habarlady.

Málimetke sáıkes, tabıǵı apat taǵy birneshe apta boıy jalǵasýy múmkin.

Buǵan deıin Vıktorııa shtatyndaǵy orman órtteriniń saldarynan bir adamnyń qaza tapqany habarlanǵan. Sonymen qatar júzdegen adam baspanasyz qalǵan. Zardap shekkenderge kómek kórsetý úshin Aýstralııanyń federaldyq úkimeti men Vıktorııa shtatynyń úkimeti birlesip 19,5 mıllıon aýstralııalyq dollar (shamamen 13 mıllıon AQSh dollary) kóleminde qarjylaı kómek bóldi.

Basylym dereginshe, Vıktorııa aýmaǵy boıynsha orman órtteri saldarynan keminde 119 ǵımarat joıylyp, 300 myń gektardan astam orman alqaby órtengen. Qazirgi ýaqytta shtat órtti sóndirý úshin áli kúresip jatyr.

Sondaı-aq senbi kúni tústen keıin búkil shtat aýmaǵynda 67 sóndirilmegen órt oshaǵy tirkelgeni, olardyń 10-y baqylaýsyz taralýyn jalǵastyrǵany habarlandy.

Eske sala ketsek, 9 qańtar kúni Aýstralııada «katastrofalyq» deńgeıdegi órt qaýpi jarııalandy.