Aptap ystyqtyń kúsheıýine jahandyq jylynýdyń áseri bar ma
ASTANA. KAZINFORM — Álem boıynsha jahandyq jylynýdyń áseri kúsheıip keledi. Mamandardyń boljamynsha, bıyl Qazaqstannyń ózinde keı óńirlerde aýa temperatýrasy +46 gradýsqa deıin jetýi múmkin. Bul týraly Uzaq merzimdi aýa raıy boljamdary basqarmasynyń 1 sanatty ınjeneri Qaısar Shaıahmetov habarlady.
— Keıingi jyldary álemde aýa raıy tosyn minez tanytyp keledi. Eýropanyń birqatar elinde buryn-sońdy bolmaǵan aptap ystyq tirkelip, keı óńirlerde orman órti jıilese, endi bir aımaqtarda nóser jaýyn men sý tasqyny kúsheıgen.
Bul úrdiske atmosferadaǵy parnıktik gazdardyń kóbeıýi men tabıǵı klımattyq tsıklderdiń ózgerýi áser etip jatyr. Álemdegi klımattyq ózgeristerdiń Qazaqstanǵa da yqpaly bar, — dedi spıker Jibek Joly telearnasynyń «Búgin Live» baǵdarlamasynda.
Onyń aıtýynsha, aldaǵy kúnderi elimizde ystyq aýa raıy saqtalady. Alaıda onkúndiktiń sońyna qaraı temperatýranyń tómendeýi yqtımal.
— Maýsymdyq boljam boıynsha, maýsym aıynda ońtústik óńirlerde temperatýra normadan 2 gradýsqa, al soltústikte 1 gradýsqa joǵary bolady. Shildede ortalyq jáne shyǵys aımaqtarda aýa temperatýrasy 1 gradýsqa, ońtústikte 2 gradýsqa joǵarylaýy múmkin. Tamyzda batys óńirlerde temperatýranyń aýytqýy 2 gradýsqa, ortalyq óńirlerde 1 gradýsqa joǵary bolady, — dedi ol.
Temperatýranyń kóterilýimen qatar, birqatar óńirde qaýipti meteorologııalyq qubylys kútiledi. Spıkerdiń aıtýynsha, maýsym aıynyń basynda Qyzylorda oblysynda shańdy daýyl men aptap ystyq boljanyp otyr. Al ózge óńirlerde aýa raıy qubylmaly bolǵanymen, kórsetkishter negizinen klımattyq norma sheginde saqtalady.
Aıta keteıik, klımattyń jylynýy álem ózenderindegi ottegi kólemin azaıtyp jatyr.
