Aptap ystyqtan Frantsııadaǵy týrıstik nysandardyń jumys ýaqyty qysqardy
ASTANA. KAZINFORM – Frantsııanyń soltústik-batysyndaǵy 24 departamentte aptap ystyqqa baılanysty eń joǵary – qyzyl qaýip deńgeıi jarııalandy. Osyǵan baılanysty Parıjdegi birqatar týrıstik nysandar jumys ýaqytyn qysqartty, dep habarlaıdy Euronews.
Eıfel munarasy ákimshiliginiń habarlaýynsha, Frantsııa astanasyndaǵy joǵary temperatýraǵa baılanysty senbi jáne jeksenbi kúnderi nysan erekshe tártippen saǵat 16:00-de jabylady.
Sondaı-aq, Lývr mýzeıi de dúısenbini qosa alǵanda kún saıyn saǵat 16:00-de jumysyn aıaqtaıdy. Al Orse mýzeıi senbiden sársenbige deıin kelýshilerdi saǵat 17:00-ge deıin ǵana qabyldaıdy.
Météo-France meteorologııalyq qyzmetiniń málimetinshe, eldiń soltústik-batysyndaǵy 24 departamentte qyzyl deńgeıdegi eskertý engizilgen. Bul shamamen 22 mıllıonnan astam turǵyndy qamtıdy.
Eldiń kóptegen óńirinde aýa temperatýrasy 35–38 gradýsqa deıin kóterilse, Býrgýndııadan Peı-de-la-Lýar óńirine deıin keı jerlerde 39 gradýsqa jetedi dep boljanýda.
Frantsııanyń qalǵan aýmaǵynyń basym bóliginde qyzǵylt sary qaýip deńgeıi saqtalyp otyr. El turǵyndary 14 shildede atap ótiletin Bastılııany alý kúni merekesine daıyndalyp jatqan kezde aptap ystyqtyń áseri kúsheıgen.
Mamandardyń aıtýynsha, bul – mamyr aıynan beri Frantsııany qamtyǵan úshinshi aptap ystyq tolqyny.
Aıta ketelik Frantsııa, Belgııa jáne Nıderlandyda aptap ystyqtan 3,7 myń adam qaıtys bolǵan edi.
